Joseph Kabila Kabange wahoze ari Perezida wa Repubulika Iharanira Demokarasi ya Congo yahunze iki gihugu, nk’uko byatangajwe n’ubuyobozi bw’ishyaka UDPS riri ku butegetsi.
Umunyamabanga Mukuru w’iri shyaka, Augustin Kabuya yabitangaje kuri uyu wa Gatandatu, ubwo yagezaga ijambo ku barwanashyaka baryo.
Kabuya yavuze ko Kabila wayoboye RDC imyaka 18 yahisemo guhunga, bijyanye n’uko ari we uri inyuma y’intambara iri muri iki gihugu.
Yagize ati: “Ku bw’amakuru yanyu, ubu tuvugana Joseph Kabila yahunze igihugu, ntabwo agituye hano. Nta kimenyetso yasize muri DGM (Ibiro bishinzwe abinjira n’Abasohoka), yagiye rwihishwa kuko ri we wihishe inyuma y’intambara ibera mu burasirazuba bw’igihugu.”
Uyu mugabo yunzemo ko urubyiruko rwo mu ishyaka PPRD rya Kabila ruheruka kwihuza n’ihuriro Alliance Fleuve Congo (AFC) ririmo umutwe wa M23 hari icyo rwari ruzi.
Iri shyaka cyakora riheruka gutangaza ko ntaho rihuriye n’abahoze ari abarwanashyaka baryo baheruka kwinjira muri ririya huriro riyobowe na Corneille Nangaa wahoze ari Perezida wa Komisiyo y’amatora muri RDC.
Mukamuhire Charlotte
