Kuri uyu wa Kane tariki ya 19 Ugushyingo 2020 Umugaba mukuru w’Ingabo za Ethiopia Gen. Birhanu Jula yashyize mu majwi umuyobozi wa OMS Dr Tedros Ghebreyesus kuba ari umwe mu baterankunga bakomeye b’ingabo za TPLF ziyoboye Leta ya Tigray yigometse kubutegetsi.
Guverinoma ya Ethiopia ishinja ishyaka riyoboye iyo Leta, Tigray People’s Liberation Front, TPLF, kwigomeka kuri guverinoma y’igihugu, kugeza ubwo Minisitiri w’Intebe, Dr Abiy Ahmed, yategetse ko ingabo za guverinoma zigaba ibitero ku ngabo z’iyo Leta, imwe mu zigize Ethiopia.
Umugaba Mukuru w’Ingabo za Ethiopia, Birhanu Jula, mu ijambo ryanyuze kuri Televiziyo y’Igihugu, yavuze ko Tedros ku giti cye ari umunyamuryango wa ririya tsinda kandi ari umunyabyaha ruharwa.
Tedros yayoboye Minisiteri zinyuranye muri Ethiopia hagati ya 2005 na 2016 ubwo Guverinoma yari iyobowe n’Ihuriro rirangajwe imbere n’ishyaka TPLF , ryayoboye igihugu kugeza ubwo Minisitiri w’Intebe, Abiy Ahmed yajyaga ku buyobozi mu 2018.
Gen. Birhanu yashinje Tedros gukoresha ijambo afite ku rwego mpuzamahanga, akagerageza gufasha mu buryo bwa dipolomasi n’intwaro iri shyaka rya TPLF.
Mu itangazo Dr Tedros yasohoye, yavuze nta ruhande na rumwe abogamiyeho muri iyo ntambara.
Ati “Hari amakuru yakomeje kuvugwa ko hari uruhande mpagazeho muri iki kibazo. Ibyo ntabwo ari ukuri kandi ndifuza kuvuga ndi ku ruhande rumwe, uruhande rw’amahoro.”
Abantu babarirwa mu magana bamaze gupfira mu mirwano ihanganishije Intara ya Tigray na Guverinoma ya Ethiopia kuva mu ntangiriro z’uku kwezi, mu gihe umubare munini w’abasivili umaze guhungurira mu gihugu cya Sudan.
