Imirwano ikomeye ihanaganishe umutwe wa M23 n’imitwe yitwaje intwaro izwi nka “Wazalendo” ,ifatanyije na FDLR ,Nyatura n’imitwe ya Mai Mai muri Teritwari ya Masisi .
Amakuru dukesha imboni yacu iherereye muri teritwari ya Masisi, avuga ko guhera ku isaha ya Sakumi n’imwe z’igitondo cyo kuri uyu wa 28 Werurwe 2023, abarwanyi ba M23 bari mu mirwano n’imitwe yitwaje intwaro iyobowe n’abitwa “Wazalendo” mu gace ka Bushunga mu kirometero kimwe ivuye Mweso.
Aya makuru, akomeza avuga ko iyi mirwano yatangijwe n’umutwe wa Wazalendo ufatanyije n’indi mitwe nka FDLR,CMC Nyatura,APCLS na Mai Mai Abazungu.
Imboni yacu iri muri teritwari ya Masisi, ikomeza ivuga ko iyi mitwe isanzwe ifatanya na FARDC kurwanya M23 yagabye igitero gikomeye muri ako gace ishaka kwerekeza mu gace ka Mweso M23 iheruka kurekura , ariko iza gukumirwa n’Abarwanyi ba M23 itarahagera.
Kugeza ubwo twandikaga iyi nkuru, imirwano yari igikomeje ariko amakuru yo kwizerwa aturuka ahari kubera imirwano akemeza ko M23 iri gusubiza inyuma ibitero by’ iyi mitwe byari bigamije kwerekeza mu gace ka Mweso.
Ni imirwano yongeye kubura mu gihe kuwa 25 Werurwe 2023, haheruka indi yahuje M23 n’umutwe wa Wazalendu mu gace ka Busumba nako kegeranye na Mweso muri teritwari ya Masisi, icyo gihe uyu mutwe ukaba nabwo warashaka kwerekeza I Mweso ariko nabwo ukumirwa na M23.
Hashize iminsi imitwe yitwaje intwaro isanzwe ifasha FARDC kurwanya M23, igerageza kujya mu duce M23 iheruka kurekure muri teritwari ya Masisi igamije kutwirukanamo ingabo za EAC , ariko M23 ikaba ikomeje kuyibera ibamba.
Mu mpera z’icyumweru gishije, nabwo imitwe yitwaje ntwaro ya FDLR,CMC Nyatura, APCLS na Mai Mai Abazungu yagabye igitero ku baturage mu gace ka Mushaki muri teritwari ya Masisi, igambiriye kwica Abatusi ariko iza gusubizwa inyuma n’ingabo z’u Burundi zigenzura ako gace zanabashije gutabara abari bagiye kwicwa n’iyo mitwe, gusa babiri muri abo baturage baza gukomereka bikomeye aho bahise bihutanwa ku bitaro bya Ndosho mu mujyi wa Goma kwitabwaho n’Abaganga.
