Impamvu  M23 ishobora kwigarurira Umujyi wa Goma mu minsi ya vuba

Umutwe wa M23 ukomeje kugaragaza ibimenyetso  by’uko ushobora kwigarurira umjyi wa Goma mu minsi ya vuba.

M23 ikomeje kwigarurira uduce twinshi ari nako  isatira Goma

Mu gihe umutwe wa M23 ukomeje kugenda urushaho kwigarurira ibice byinshi muri Teritwari ya Rutshuru , hari amakuru yemeza ko bishobora kurangira  iruhukiye mu mujyi wa Goma.

Kuva imirwano yakongera kubura guhera tariki ya 19 Ukwakira 2022 ,umutwe wa M23 wakomeje kwigarurira ibice bitandukanye muri Teritwari ya Rutshuru intara ya Kivu y’Amajyaruguru byiyongera ku bindi wari waramaze kwambura FARDC  muri Kamena 2022  harimo n’umujyi ukomeye wa Bunagana.

Amakuru yo kuzwirwa dukesha imboni yacu iri muri Teritwari ya Rutshuru, yemeza ko ubu M23 iri kurwanira ku muvuduko wo hejuru  ndetse ko mu gihe iyi mirwano yaba idahagaze, byarangira mu gihe gito M23 yigaruriye Umujyi wa Goma.

Mu Cyunweru kimwe gusa kuva imirwano yakongera kubura, M23imaze kwigarurira uduce twinshi turimo Rutshuru centre,Ntamugenga,Karengera,Gako,Biruma,Gare,Matebe,Rangira,Rubare,rukoro,Kiringa,Kumunezero,Kalambi,Busanza, Bugani,Burayi, Kanombe,Kazuba,Kanyabusoro,katale,Kibaya … twiyongera ku tundi nka Bunagana,Cunzu,  Kabindi Chengerero,Runyoni  n’ahandi hose higaruriwe na M23 muri Kanama 2022.

Ubu M23 ,  iri kurwana yerekeza ku gufata  agace ka Rumangabo gaherereyemo ikigo cya gisirikare gikomeye muri Kivu Y’amajyaruguru, ndese ukaba wabashije gufata tumwe mu duce turi mu nkengero z’aka gace.

Imirwano ikomeye iri kubera ku muhanda Rutsuru-Goma, Nyuma y’indi mirwano ikomeye yahuje ingabo za FARDC  n’inyeshyamba za M23 mu gace ka Karengera ejo kuwa 27 Ukwakira 2022 , hakaba hari kwifashishwa, inzira ya Tongo-Kazaroho kugirango ubashe kugera mu Mujyi wa Goma  .

Amakuru yo kwizerwa aturuka ahari kubera imirwano, yemeza ko M23 nibasha kwigarurira  Rumangabo yose n’Umjyi wa Rutshuru  ndetse ikaba yabasha kugenzura umuhanda wa Rutshuru-Goma bidasubirwaho,  ishobora guhita ishyira icyerekezo cyayo ku Mujyi wa  Goma .

Impamvu M23 ishobora kwerekeza mu mujyi wa Goma

Mu gihe ubutegetsi bwa DRC bwakomeje kwanga ibiganiro, M23 yo yakomeje kubifata   nko kudaha agaciro Abanyekongo bavuga Ikinyarwanda barwanira uburenganzira bwabo.

iyi ngo ni imwe mu mpamvu zishobora gutuma  M23 ikomeza imirwano kugeza ifashe  Umujyi wa Goma ,ufatwa nk’Umurwa mukuru wa Kivu y’Amajyaruguru , mu rwego rwo gushyira igitutu ku Butegetsi bwa Perezida Felix  Tshisekedi kwemera ibiganiro, ngo kuko wamaze gusanga Bunagana yonyine idahagije kugirango Abategetsi ba DRC bemere ko M23 ari umutwe bagomba  kwicara bakumvikana.

Ikindi ngo M23 irashaka kwihaniza FARDC kutongera guhirahira  igerageza kuyigabaho igitero nk’uko iheruka kubikora ifatanyije na FDLR na Mai  Mai Nyatura kuwa 19 Ukwakira 2022, byatumye imirwano yongera kubura .

Ibi M23 irimo iragenda ibigeraho nyuma yaho FARDC n’abafatanyabikorwa bayo barimo FDLR na Mai Mai Nyatura , bakomeje guhunga imirwano bagata ibirindiro byabo.

Hari andi makuru yemeza ko zimwe mu ngabo za FARDC ziri gukuramo impuzankano za Gisirikare zikambara iza gisivile mu rwego rwo gukwepa imirwano.

Mu gihe abarwanyi ba M23 bari kurwana binjira mu mujyi wa Rutshuru  , ingabo za FARDC ,FDLR na Mai Mai Nyatura    zatangiye guhunga uwo mujyi zerekeza ahitwa Rwindi.

Guhunga kw’ingabo za  FARDC biraturuka  ku kuba zikomeje gusumbirizwa  n’inyeshyamba za M23 .

ibi nibyo byatumye Lt Gen Ekenge umuvugizi wa FARDC,  yasabye itangazamakuru kudashyira hanze amakuru y’urugamba bitewe n’uko FARDC  iri gutsindwa uruhenu akaba ariyo nayo mpamvu Ubuyobozi bw’ingabo za FARDC  budashaka ko ayo makuru ajya hanze.

HATEGEKIMANA Claude

Rwandatribune.com