Mu gitero cyagabwe n’umutwe wa CODECO kuwa Kane tariki ya 11 Kanama 2022, abantu 13 bishwe hanashimutwa Abashinwa 4 bari basanzwe bakorera ikigo gicukura amabuye y’agaciro.
Ibitangazamakuru binyuranye byandikirwa muri RD Congo, biranyuranya ku mubare w’ababa baguye muri iki gitero cyashimutiwemo Abashinwa 4.
Ikinyamakuru Politico.cd cyanditse ko muri iki gitero cya CODECO cyaguyemo abantu 3, barimo Abashinwa 2.
MediaCongo.net yo yanditse ko Abashinwa 4 bashimuswe naho abarwanyi 13 b’umutwe wa Zaire bimaze kwemeza ko bishwe n’izi nyeshyamba.
Bivugwa ko amakimbirane yaje kuvamo ishimutwa ry’Abashinwa, yatangiye ubwo inyeshyamba za Zaire zagabaga igitero ku birindiro bya CODECO, Mu gace ka Tchangana ko muri Gurupoma ya Kirongozi.
Abarwanyi ba CODECO ngo bahise batangira gusubiza amasasu y’abo barwanyi, ku buryo yabaye imirwano ikomeye yaje no gukomereza mu bice bihegereye, birimo n’agace ka Madombo karimo ikirombe cy’Abashinwa gicukurwamo Zahabu.
Media Congo ivuga ko mu bantu 13 biciwe muri iki gitero bose ari abarwanyi b’umutwe wa Zaire, naho ku ruhande rwa CODECO ho ngo hakomerekeyemo umuntu umwe.
