Umurwa mukuru Nairobi abaturage bahiye ubwoba kubera imyigaragambyo yatangajwe n’abashyigikiye Raila Odinga uherutse gutsindwa amatora ya Perezida wa Kenya.
Iyi myigaragambyo karundura bivugwa ko igomba kubera mu mijyi 2 irimo n’umurwa mukuru wa Kenya ariwo Nairobi.
Iyi myigaragambyo ngo ni iyo kwamagana izamuka ry’imisoro iri muri iki gihugu, abashyigikiye uyu mugabo bo bakaba bashinja William Ruto na Guverinoma ye ko aribo nkomoko y’ibi byose.
Imyigaragambyo itegerejwe muri Kenya isa n’ikomeye cyane. Abatavugarumwe n’ubutegetsi bakanguriye abantu kuyitabira ari benshi, mu bice by’imijyi hari umwuka w’ubwoba mu bakora ubucuruzi ko bashobora gusahurwa utwabo.
Abashishikariza imyigaragambyo ku mbuga nkoranyambaga bakoresha ijambo ry’Igiswahili ‘Tumechoka’ mu guhamagarira abantu kujya mu myigaragambyo ari benshi.
Abajya ku mirimo benshi nabo bahisemo kuguma mu ngo zabo kuko batizeye umutekano mu mihanda n’aho bakorera.
Ubusanzwe uyu mugabo utavuga rumwe na Leta, si ubwa mbere ateguye imyigaragambyo kandi bikarangira iguyemo abantu benshi, kuko Polisi kenshi iba iri guhangana n’insoresore ziba zishaka kwigabiza ibya rubanda.
