Muri Repubulika ya Demokarasi ya Congo, inyeshyamba zifatanyije n’ingabo za Congo (FARDC) kurwanya inyeshyamba za M23 zasubiranyemo. Izo nyeshyamba zasubiranyemo ni izo mu mutwe wa CNPSC, uyobowe n’uwiyita Gen Hamuri Yakutumba wasubiranyemo nabo bari basanzwe bafatanya, bo mu mutwe wa Maï Maï Biroze Bishambuke.
Amakuru yatanzwe na bamwe mu barwanyi bo muri iyo mitwe batubwiye ko imirwano yo guhangana kwiyo mitwe, yahereye mu bice byo kwa Nyange na Ngalula, muri Teritware ya Fizi, Intara ya Kivu y’Amajepfo.
Iyi mirwano ikaba ngo yakomotse ku gasuzuguro kabaye hagati ya ba Bembe n’Abapfulero.
Uwatanze amakuru yatangaje ibi agira ati “Umutwe wa CNPSC ugizwe n’aba Bembe naho Maï Maï Bishambuke, igizwe ahanini n’Abapfulero n’Abanyindu.”
Yakomeje avuga ko aba CNPSC bagiye bahohotera Abapfulero kenshi bakabafungira ubusa ndetse n’Abarwanyi ba Biroze Bishambuke mu gihe bahuye n’abagize umutwe wa Gen Yakutumba, bahitaga babica uwo batishe agafungwa, aha rero niho haviriyemo intambara.”
Iyo mirwano yaba imaze ibyumweru bibiri iri kuba kugeza uyu munsi, ubwo twandikaga iyi nkuru irakomeje nk’uko byatangajwe n’abo mu mutwe wa CNPSC uyobowe na Gen. Hamuri Yakutumba, bafatikanije n’ingabo za Repubulika ya Demokarasi ya Congo FARDC. Ibi ngo bikaba byarateye Maï Maï Bishambuke guhungira mu mashamba.
Iyo mitwe yombi ikaba yari isanzwe ihuriye ku izina Wazalendo ikindi ni uko bahora bihuza mu kurwanya Abanyamulenge no kunyaga ibyabo aho bavuga ko bashaka kubarwanya ngo ba barimbure abasigaye ngo ba bohereze i Rwanda.
Uwineza Adeline
Rwanda tribune
