Lt Gen Ndima yahamagajwe I Kinshasa kwisobanura ku bwicanyi buheruka kubera mu mujyi wa Goma, aho bivugwa ko ariwe watanze uburenganzira bwo kurasa mu myigaragambyo iheruka kubera muri uwo murwa mukuru w’intara ya Kivu y’amajyaruguru.
Ubusanzwe Constant Ndima niwe Guverineri washyizweho mu ntara ya Kivu y’Amajyaruguru, akaba ashinjwa kuba yaragize uruhare mu bwicanyi bwahitanye abarenga 100, muri iyo myigaragambyo yabereye mu mujyi wa Goma mu minsi ishize.
Uyu Guverineri yahamagajwe I Kinshasa nyuma y’uko kuwa Gatandatu w’icyumweru gishize Perezida Tshisekedi yari yohereje I Goma, Itsinda ryarimo Minisitiri w’ingabo, Jean Pierre Bemba n’uwumutekano Peter Kazadi, mu rwego rwo gusuzuma ibyabaye.
Itangazo ririya Tsinda ryasohoye rivuga ko hamaze gufatwa ingamba zikomeye zirimo no guhamagaza Guverineri Ndima ukuriye Kivu y’amajyaruguru.
Usibye uyu musirikare kandi, hanahamagajwe abapolisi babiri bakomeye bakekwaho kugira aho bahurira na buriya bwicanyi bakorewe abigaragambyaga.
Lt Gen Constant Ndima, yatumijwe nyuma y’uko hari amakuru avuga ko ariwe watanze amakuru ku basirikare ngo barase abigaragambyaga.
Lt Gen Ndima atumijwe kwisobanura nyuma y’aho itsinda ryoherejwe na Leta ya Kinshasa gukora iperereza ryahise rifunga Gen. Major Ephraim Kabi ukuriyre umutwe w’abasirikare barinda Tshisekedi, na Col Mike Mikombe Uyobora Abasirikare bo muri uriya mutwe baba mu mujyi wa Goma
Uwineza Adeline
