Umutwe wa M23 uvuga ko udakwiye gushyirwa ku munzani umwe n’indi mitwe iri mu burasirazuba bwa Repubulika Iharanira Demokarasi ya Congo nka FDLR na ADF, kuko wo ufite icyo urwanira, mu gihe iyi yindi imena amaraso y’inzirakarengane.
Ni nyuma yuko uyu mutwe ugarutsweho mu Nteko y’Umuryango wa Afurika Yunze Ubumwe wasabye M23 kimwe n’indi mitwe nka FDLR ndetse na ADF guhagarika imirwano no kuva mu bice byose igenzura.
Ibi byo gushyirwa mu gatebo kamwe n’iyi mitwe y’imenamaraso, byashenguye umutwe wa M23 kuko usanzwe urwanya ibikorwa bibi bikorwa n’iyi mitwe yica abaturage ifatanyije na FARDC.
Uyu mutwe uvuga ko utumva ukuntu “Umuryango wa Afurika Yunze Ubumwe washyira mu gatebo kamwe M23 n’imitwe y’iterabwoba nka ADF na FDLR n’indi.”
Bamwe mu basesenguzi bavuga ko ibitangazwa na M23 bifite ishingiro kuko bimwe mu bikorwa uyu mutwe urwanya bikorwa n’iyi mitwe bawugereranyije na wo.
Bavuga ko nka FDRL ntawutazi ko ari umutwe w’iterabwoba ukomoka ku basize bakoze Jenoside yakorewe Abatutsi mu Rwanda bakajya kuyikomereza muri Repubulika Iharanira Demokarasi ya Congo.
Ni kimwe na ADF ihora yica abaturage umusubirizo, ikabasahura ndete ikanabatwikira, bityo ko iyi mitwe yombi itari ikwiye gushyirwa mu ku rutonde rumwe na M23.
Bavuga kandi umutwe wa M23 unarwanya ibikorwa bikorwa n’iyi mitwe yindi, bityo ko ukwiye guhabwa umwihariko ukaganira na Guverinoma ya Congo nubwo ikomeje kubitera umugongo.
RWANDATRIBUNE.COM
