Nyuma y’imirwano ikaze yari imaze icyumweru cyose kuri ubu igihari ni uko Abakomando ba M23 babashije kwambura RUD URUNANA Umunyakenyakazi w’ Umushoferi wari warashimutiwe i Binza n’inyeshyamba z’ umutwe wa RUD-URUNANA.
Ihuriro AFC ryibumbiyemo imitwe ya Politiki n’iyitwaje intwaro irimo na M23, ryasobanuye ko Munyao usanzwe atwara ikamyo yashimutiwe muri Gurupoma ya Binza, Teritwari ya Rutshuru mu Ntara ya Kivu y’Amajyaruguru.
AFC yagize iti “Abagize ihuriro ry’ingabo za Leta ya Kinshasa, ari bo FDLR na RUD URUNANA, bashimuse Umunyakenyakazi utwara ikamyo, Florence Wanza Munyao, muri Kisiguro, Gurupoma ya Binza Tariki ya 27 Kanama 2024, ku isaha ya Saa Sita.”
Bivugwa ko umuryango w’uyu Munyakenyakazi tariki ya 28 Kanama 2024 wagiye kuri Minisiteri y’Ububanyi n’Amahanga ya Kenya gusaba guverinoma kumubohoza, gusa byageze tariki ya 3 Nzeri ugitegereje igisubizo.
Komiseri muri Komisiyo ya Kenya ishinzwe gukurikirana ibikorwa by’Inteko zishinga amategeko, Johnson Muthama, yasabye Minisitiri w’Intebe akaba na Minisitiri w’Ububanyi n’Amahanga, Musalia Mudavadi kubohoza uyu Munyakenyakazi.
Muthama wabaye umusenateri mu karere ka Machakos, yagize ati “Ndasaba Minisitiri w’Intebe unasanzwe ari Minisitiri w’Ububanyi n’Amahanga kubohoza ‘Grace’ Wanza Munyao, Umunyakenyakazi akaba n’umushoferi w’ikamyo, washimuswe na FDLR, umwe mu mitwe igize ihuriro ry’ingabo za Kinshasa, tariki ya 27 Kanama 2024.”
Umunyamakuru ‘Juma G’ wo muri Kenya na we yatabarije uyu Munyakenyakazi, anenga guverinoma y’igihugu cyabo ikomeje guceceka mu gihe akiri mu maboko y’abarwanyi ba FDLR.
Umunyamabanga Mukuru muri Minisiteri y’Ububanyi n’Amahanga ya Kenya, Roseline Kathure Njogu, yasubije uyu munyamakuru ko guverinoma iri gukurikirana iki kibazo. Roseline yasobanuye ariko ko amakuru y’aho ikibazo kigeze gikurikiranwa atashyirwa ku mbuga nkoranyambaga bitewe n’uburemere bwacyo.
Nyuma y’ibyo byose Abarwanyi ba M23 banze kurebera batangiza ibitero bikomeye kuri RUD URUNANA na FPP imitwe igizwe n’abahoze ari abarwanyi ba FDLR bafite ibirindiro mu bice bya Binza,mu mirwano yari imaze icyumweru kirenga kuri uyu wa kabiri nibwo hamenyekanye amakuru Rwandatribune ifitiye gihamya ko uyu munya Kenya yabohojwe na M23 mu gace ka Nyamirima,gaherereye muri Gurupoma ya Binza,Teritwari ya Rutchuru ,uyu mu Nyakenya yahise yoherezwa iGoma kugirango afate indege imugeza iNailobi.
Ntiharamenyekana neza abarwanyi ba FPP na RUD URUNANA baguye muri iyi mirwano twagerageje kuvugana na Bwana Lawrence Kanyuka Umuvugizi wa M23 mu bya politiki ntitwamubona kugeza ubwo twandikaga iyi nkuru.
Mwizwerwa Ally
Rwandatribune
