Minisitiri w‘ingabo w’igihugu cy’u Bushinwa, Li Shangfu biravuga ko yaburiwe irengero, hakaba hashize igihe kirenga ibyumweru bibiri atagaragara mu ruhame.
Ikinyamakuru, The Financial Times kuwa Kane cyatangaje ko abayobozi ba Leta Zunze Ubumwe z’Amerika bavuze ko Minisitiri Li Shangfu ari gukorwaho iperereza ku byaha akekwaho.
Umwe mu begereye abafata ibyemezo mu Bushinwa, yatangaje ko Minisitiri Li Shangfu yafashwe mu Cyumweru gishize akaba ari gukurikiranwa ariko ntiharatangazwa ibyaha akurikiranyweho.
Umuvugizi wa Minisiteri y’Ububanyi n’Amahanga y’u Bushinwa, Mao Ning, yavuze ko ibijyanye n’itabwa muri yombi ry’uyu mugabo ntacyo abiziho.
Ibi bibaye nyuma y’uko Qin Gang wari Minisitiri w’Ububanyi n’Amahanga yakuweho mu buryo budasobanutse muri Nyakanga 2023. Yari amaze ukwezi atagaragara mu ruhame.
Ku mbuga za Leta y’u Bushinwa n’igisirikare Li Shangfu aracyagaragara ku rutonde rw’abayobozi, haba muri guverinoma no mu gisirikare.
Li Shangfu yaburiwe irengero mu gihe hari hashize iminsi habaye impinduka mu gisirikare, ndetse abasirikare bakuru bakuwe mu buyobozi bari bamaze iminsi batagaragara mu ruhame.
Li Shangfu yagaragaye bwa nyuma mu ruhame kuwa 29 Kanama 2023 ubwo yagezaga ijambo ku bitabiriye inama yahuje ibihugu bya Afurika n’u Bushinwa yiga ku mahoro n’umutekano yabereye i Beijing.
Minisitiri w‘ingabo w’igihugu cy’u Bushinwa, Li Shangfu yagiye kuri uyu mwanya muri Werurwe 2023.
Uwineza Adeline
