Mu ijoro ryo kuri uyu wa 27 Mata 2020 nibwo Perezida Kagame Paul yakuye General Patrick Nyamvumba ku mwanya wa minisiti w’umutekano w’imbere mu gihugu,umwanya yari amazeho igihe kibarirwa mu mezi.
General Patrick Nyamvumba yavutse tariki 11 Kamena 1967. Yakuriye imirimo itandukanye mu Ngabo z’u Rwanda, irimo nko kuyobora Batayo y’Ingabo zirwanira ku butaka, umutwe wa Mechanised ndetse Brigade y’Ingabo zirwanira ku butaka. Iyo mitwe yagiye ayiyobora mu 1995, 1996 no mu 1997.
Hagati y’umwaka w’1998 n’1999, General Patrick Nyamvumba yabaye umuyobozi ukuriye operasiyo n’imyitozo ku rwego rw’icyicaro gikuru cy’ingabo. General Nyamvumba yayoboye ikigo gishinzwe gutegura abasirikare bajya mu butumwa bw’amahoro kuva 2004 kugera 2006.
Yanashinzwe kandi kuyobora itsinda ryiga ihurizwa hamwe ry’umutwe umwe w’ Ingabo z’u Rwanda, kuyobora Komite ishinzwe Ingengo y’imari y’Ingabo, ayobora n’umushinga wari ushinzwe kwiga ishyirwaho ry’ Ishuri Rikuru rya Gisirikare.
Gen Patrick Nyamvumba yanabaye intumwa ihuza u Rwanda n’urwego rw’ Umuryango w’Afurika Yunze Ubumwe (AU) n’ Umuryango w’Abibumbye (UN), aho yagiye ashingwa kuganira n’izo nzego no gusinya amasezerano y’ubufatanye ahagarariye igihugu cy’u Rwanda.
Mu kwezi kwa Werurwe ubwo yari umugaba Mukuru w’Ingabo z’u Rwanda (RDF), Gen. Patrick Nyamvumba yagiye mu ruzinduko mu gihugu cy’u Bushinwa rugamije gutsura umubano hagati y’Ingabo z’ibihugu byombi.
General Patrick Nyamvumba yarangije mu Ishuri Rikuru rya Gisirikare muri Nigeria ndetse yize no mu Ishuri Rikuru rya gisirikare muri Zambia ryitwa Zambia Defence Services Command and Staff College. Nyuma yaho yize mu Ishuri rikuru ry’ingabo ryigisha amahoro muri Afurika y’Epfo muri 2003. (Alprazolam)
General Patrick Nyamvumba afite ubunararibonye mu bijyanye n’amahugurwa n’inama zitandukanye ku bijyanye n’ivugurura ry’ inzego z’umutekano (Security Sector Reform), amategeko mpuzamahanga agenga Intambara, ibikorwa byo kubungabunga amahoro ndetse n’amahugurwa y’abayobozi bari ku rwego rwo hejuru yagiye abera muri Afurika no muri Amerika.
General Patrick Nyamvumba yari Umuyobozi Mukuru w’ishami rya gisirikare rishinzwe gucunga ibikoresho byose bya Gisirikare, mbere yo gushingwa kuyobora ingabo za Loni n’iz’ Afurika yunze ubumwe mu butumwa bw’amahoro i Darfur muri Sudani (UNAMID). Yashinzwe kuyobora ingabo za Loni ihuriyeho n’Umuryango w’Afurika yunze Ubumwe i Darfur kuva muri Nzeli 2009 kugeza muri Werurwe 2013. Kuva muri Kamena 2013 yagizwe Umugaba mukuru w’Ingabo z’u Rwanda kugeza mu kwezi k’Ugushyingo 2019 ubwo yagirwaga Minisitiri w’Umutekano, akaba yari amaze amezi hafi atandatu kuri uyu mwanya yakuweho kuri uyu wa Mbere tariki 27 Mata 2020.
UMUKOBWA Aisha
