Mu mirwano igaragayemo umutwe wa RUD-Urunana bwa mbere iri ku ruhande rwa FARDC, urugamba rwongeye gushyuha cyane aho umutwe wa M23 uri kurwanira mu marembo y’Umujyi wa Bunagana.
Mu rukerera rwo kuri uyu wa gatanu tariki ya 10 Kamena 2022, ingabo za FARDC zifatanyije na RUD-Urunana zagabye igitero gikomeye mu gace ka Runyoni na Canzu, habaho kurasana gukomeye kwakomereje ku musozi wa Kabonero uri muri Gurupoma ya Jomba muri Teritwari ya Rutschuru.
Umunyamakuru wa Rwandatribune uri Bunagana, yavuze ko kuva mu masaha ya saa tanu kugeza saa saba, urugamba rwaje guhindura isura aho abarwanyi ba RUD-Urunana bashinze imbunda ku musozi wa Kabonero bagatangira gusuka ibisasu mu bice bihanye umupaka n’u Rwanda.
Ahagana mu masaha ya saa munani inyeshyamba za M23 zaje guhindukirana ingabo za FARDC zizambura umusozi wa Kabonero zikaba ziri kwerekeza mu mujyi wa Bunagana.
Umwe mu bayobozi ba sosiyete sivile muri Gurupoma ya Jomba, amaze kubwira Rwandatribune ko abaturage babo bari guhungira muri Uganda, mu gihe ingabo za Leta na zo ziri guhunga umujyi.
Ally MWIZERWA
RWANDATRIBUNE.COM
