Mu gitondo cyo kuri uyu wa Gatanu umuyobozi wungirije w’Akarere ka Musanze ushinzwe iterambere ry’ubukungu, Ndabereye Augustin, yatawe muri yombi n’Urwego rw’Igihugu rw’Ubugenzacyaha (RIB) akekwaho gukubita umugore bashakanye akanamukomeretsa.
Bivugwa ko uyu muyobozi yari amaze igihe kinini afitenye amakimbirane n’umufasha we kugeza ubwo n’inzego z’ubuyobozi bwari bwaratangiye kwinjira muri iki kibazo.
Amakuru atangwa na bamwe mu baturanyi b’uyu muryango mu Mudugudu wa Burera, Akagari ka Ruhengeri, mu Murenge wa Muhoza mu Karere ka Musanze agaragaza ko ku mugoroba wo kuri uyu wa Kane bagiranye amakimbirane maze umugabo yadukira umugore aramukubita ndetse amukurura imisatsi bimuviramo gukomereka ahita ajyanwa ku Bitaro bya Ruhengeri.
RIB ibinyujije ku rubunga nkoranyambaga rwa Twitter yatangaje ko yamaze guta muri yombi Visi Meya Ndabereye magingo aya akaba afungiye kuri Sitasiyo ya RIB ya Muhoza mu gihe hagikorwa iperereza.
Ubwanditsi
