Perezida wa Repubulika ya Uganda, Yoweri Museveni yatangaje ko ingabo z’igihugu ayoboye (UPDF) ziteguye guhigira umutwe w’iterabwoba wa ADF yagereranyije na kanseri cyangwa parazite, muri Repubulika ya Demukarasi ya Congo (RDC).
Museveni mu butumwa bwo kuri uyu wa 27 Kanama 2021, yatangaje ko ADF iri inyuma y’ibikorwa bihungabanya umutekano w’abaturage ba Uganda, ikabikora iturutse mu burasirazuba bwa RDC.
Ubu butumwa yabutanze yibuka Maj. Gen. Paul Lokech wari umuyobozi mukuru wungirije wa Polisi, uherutse gupfa azize uburwayi. Uyu musirikare ni umwe mu barwanyije ADF mu buryo bukomeye, ihungira muri RDC.
Ni nyuma kandi y’aho umugabo witwa Abdul Katumba kuri uyu wa 26 Kanama 2021, yafatanwe ibiturika bikekwa ko yashakaga gutera mu bitabiriye umuhango wo gushyingura Gen. Lokech, akabica.
Uyu Mukuru w’Igihugu yavuze ko ari kuvugana n’uwa RDC, Félix Tshisekedi kugira ngo ingabo za Uganda zemererwe gusangayo ADF, ziyigabeho ibitero.
Yagize ati: “Imigambi n’amabwiriza yo kutwicira abantu bituruka ku bariya bakora ibikorwa by’iterabwoba mu burasirazuba bwa Congo. Dukomeje kuvugana na Nyakubahwa Tshisekedi kugira ngo dukureho iriya kanseri.”
Yakomeje ati: “Ingabo zacu ziteguye guhana izi parazite. Dukeneye gusa ubufatanye bwa Guverinoma ya Congo.”
ADF cyangwa ni umutwe w’iterabwoba wegamiye kuri IS (Islamic State) ukomoka muri Uganda. Ukunze kumvikana ugaba ibitero muri Teritwari ya Beni mu Ntara ya Kivu y’Amajyaruguru muri no mu ntara ya Ituri muri RDC.
