Igisirikare cya Repubulika Iharanira Demokarasi ya Congo (FARDC) cyigambye kwirukana umutwe wa M23 muri tumwe mu duce two muri Teritwari ya Masisi, nyuma y’ibitero kivuga ko cyatangiye kugaba ku nyeshyamba z’uwo mutwe urwanya leta ya Congo.
FARDC yabyigambye biciye mu butumwa umuvugizi wayo mu ntara ya Kivu y’Amajyaruguru yanyujije ku rubuga rwe rwa X, aho Lt Col Guillaume Ndjike Kaiko yavuze ko ingabo za Leta kuri ubu ari zo zigenzura uduce tw’imisozi twa Bweru, Bihambwe, Mema, Kaniro, Kavumu, Kasake, Kashovu na Bitonga.
Uyu Lt Col Guillaume Ndjike Kaiko yavuze ko FARDC yatwigaruriye nyuma y’uko M23, Kinshasa yita RDF ikwiye imishwaro igahunga nyuma y’ibitero bikomeye yagabweho.
Ati: “FARDC yatangije ibitero mu gitondo cyo kuri uyu wa gatatu tariki ya 22 Gicurasi byo kurwanya M23 / RDF, ibikorwa birakomeje kandi Ingabo za Congo, ubu ziragenzura uduce twa BWERU, BIHAMBWE, MEMA, KANIRO, KAVUMU, KASAKE, KASHOVU na BITONGA.
Uyu mutwe cyakora ukunze gushinja izi ngabo na Leta ya RDC gukwiza amakuru y’ibihuha atandukanye n’ukuri ko ku rugamba.
Nko mu mpera z’icyumweru gishize Lt Col Willy Ngoma uvugira Igisirikare cya M23 byabaye ngombwa ko anyomoza Minisitiri w’Ingabo za RDC, nyuma yo gutangaza amakuru atari yo y’uko FARDC yirukanye M23 mu duce twa Kibirizi na Vitshumbi two muri Teritwari ya Rutshuru.
Rwandatribune.com
