Olusegun Obasanjo wahoze ari Perezida wa Nigeria yamaganye ibihuha byuko atahawe ikaze muri Ethiopia nk’umuhuza mu ntambara muri icyo gihugu.
Avugira muri Ethiopia, aho amaze igihe ahura n’abo ku mpande zombi ziri mu mirwano, yabwiye ikiganiro cyo kuri radio cya BBC Focus on Africa dukesha iyi nkuru ati: “Nta muntu n’umwe wanze ubuhuza bwanjye”.
Bwana Obasanjo, umuhuza wagenwe n’umuryango w’Ubumwe bw’Afurika (AU/UA), yagize ati: “Minisitiri w’intebe [Abiy Ahmed] yampaye akanya kuri buri kintu cyose nasabye. Yamfashe mu buryo bw’ikinyabupfura cyo ku rwego rwo hejuru cyane”.
Avuga ku ruzinduko rwe rwo ku cyumweru mu murwa mukuru Mekelle w’akarere ka Tigray mu majyaruguru, Bwana Obasanjo yagize ati:
“Perezida wa Tigray… yanyakiriye mu buryo nakwakirwamo n’umutegetsi wo muri Afurika… rero igitekerezo cyo kumpa akato no kutanyakira n’ibindi byose ntabwo ari ukuri”.
“Buri muntu wese ari kuvuga ati: ‘Umva, twishimiye ko wagenwe [nk’umuhuza]. Turabizi ko iyi ari yo nzira. Turashaka umuntu w’umuhuza w’umunyakuri… kandi nta wundi twabona mwiza ukurenze'”.
Naho se ku biganiro byo gusoza intambara imaze umwaka yatumye abantu babarirwa muri za miliyoni ubu bacyeneye imfashanyo y’ibiribwa?
Uyu wahoze ari Perezida wa Nigeria yirinze kugira icyo avuga kuri ibi.
Yavuze ko ubu arimo “kugerageza gutahura ibibazo by’ingenzi ku matsinda atandukanye”, mbere yuko akomoza ku kibazo gikomeye cy’ibiganiro.
Getachew Reda, umuvugizi w’umutwe w’inyeshyamba wa Tigray People’s Liberation Front (TPLF), mbere yari yatangaje kuri Twitter ifoto ya Bwana Obasanjo ari kumwe n’umukuru wa TPLF Debretsion Gebremichael, anavuga ko ibiganiro byari “ingirakamaro”:
Intambara yatangiye gute?
Imirwano yakajije umurego kuva mu kwezi kwa gatandatu uyu mwaka ubwo inyeshyamba zisubizaga igice kinini cya Tigray harimo n’umurwa mukuru wayo Mekelle.
Ubu zibumbiye mu mutwe wa Tigray Defence Forces (TDF) uhuriwemo na TPLF n’indi mitwe yitwaje intwaro yaho. TPLF iherutse gutangaza ko yumvikanye n’indi mitwe umunani ngo barwanye ubutegetsi bwa Bwana Abiy.
Ishyaka rya TPLF ni ryo ryari ku butegetsi mu karere ka Tigray mbere yuko rihirikwa n’ingabo za leta ya Ethiopia mu kwezi kwa cumi na kumwe mu 2020.
Abakuru ba TPLF bashwanye na Minisitiri w’intebe wa Ethiopia Abiy Ahmed ku bijyanye n’amavugurura muri politiki, nubwo kuba TPLF yarafashe ibigo bya gisirikare by’ingabo za leta byo muri Tigray mu majyaruguru ari yo yabaye imbarutso y’igitero leta yayigabyeho ku itariki ya 4 y’ukwa 11 mu 2020.
Leta ya Ethiopia ivuga ko TPLF ari umutwe w’iterabwoba, ariko TPLF yo ivuga ko ari yo leta y’akarere ka Tigray yemewe n’amategeko.
