Perezida wa Repubulika, Paul Kagame, yasezeranyije uwitwa Diane Kamali uvuga ko yahohotewe n’umushoramali Dr. Francis Habumugisha kubona ubutabera.
Ni nyuma y’amezi agera kuri abiri uyu Kamali atangaje ko yakubitiwe mu ruhame na Dr. Habumugisha usanzwe azwiho kuba afite ibikorwa byinshi by’ishoramari birimo ‘GoodRich TV’.
Uyu Kamali yanyarukiye ku rubuga nkoranyambaga rwa Twitter rukunze gukoreshwa n’abayobozi bakuru mu gihugu maze avuga iby’akababaro ke ndetse abimenyesha (tag) Perezida Kagame n’ibiro bye ndetse na Madame Jeannette Kagame.
Ubutumwa bwa Kamali bugira buti “Nakubitiwe Muruhame numugabo witwa Dr Francis (GoodRich TV). Kuwa 16.07.2019 Mbimenyesha @RIBRwanda hashize amezi 2 atarahanwa,ese kuba umuntu afite amafaranga, ngo anaziranye nabayobozi bakomeye bimwemerera guhohotera ntahanwe? @PaulKagame @FirstLadyRwanda @UrugwiroVillage”
Ubwo butumwa Kamali yabwongeyeho amashusho ashimangira ihohoterwa avuga ko yakorewe maze asobabura ko, “Yarari (Dr. Francis) gutuka ibitutsi nyandagazi uwo mwana wumukobwa mubona uhagaze muri video, agira ngo ndi gufata video na telephone yanjye, niko kuyinyaka akayivuna akanankubita urushyi.”
Mu rukerera rwo kuri uyu wa Gatatu tariki ya 11 Nzeli, Perezida Kagame yasubije uriya muturage amwizeza kugira igikorwa ku kibazo yagaragaje.
Abinyujije kuri Twitter Perezida Kagame yanditse ati, “Tuzabikurikirana tumenye mu by’ukuri icyabaye hanyuma hakorwe igikwiye. Byaba bitangaje niba RIB (Urwego rw’igihugu rw’ubugenzacyaha) yaba yaramenyeshejwe ntibakore icyari gikwiye.”
RIB ndetse n’umunyamabanga mukuru wayo, Col. Jeannot Ruhunga nabo bahise bandika ko hari ibiri gukorwa kugira ngo uyu munyarwanda ahabwe ubutabera.
Ubutumwa bwa RIB busubiza Kamali kuri Twitter bugira buti, “Mwiriwe Diane, Ikirego cyawe cyarakiriwe kiranakurikiranwa uzeguca aho watanze ikirego bakumenyeshe aho dosiye igeze. Kandi turakwizeza ko uzahabwa ubutabera kuko ntamuntu numwe uri hejuru yamategeko.”
Ubwanditsi
