Perezida w’u Burusiya, Vladimir Putin yasabye mugenzi we w’u Bufaransa, Emmanuel Macron ko Ibihugu by’Iburengerazuba bigomba guhagarika ubufatanye na Ukraine no gukomeza kwivanga mu Ntamabara iri kubera muri iki Gihugu.
Perezida Putin yabibwiye Emmanuel Macron mu kiganiro bagiranye kuri Telephone ubwo bagarukaga ku kibazo cy’intambara u Burusiya bwashoje muri Ukraine.
Muri iki kiganiro cyabaye nyuma y’igihe kingana n’ukwezi batavugana, Perezida Macron yasabye ko iyi ntambara yatangijwe n’u Burusiya yahagarara ndetse hagatangira inzira y’ibiganiro by’amahoro.
Perezida w’u Bufaransa yasabye Putin ko yakongera agatanga akandi gahenge kugira ngo abantu bakiri muri Mariupol bahungishwe.
Uyu mujyi wa Mariupol ukiri kuberamo intambara zikomeye, haracyarimo abasivili amagana n’amagana bivugwa ko bakigotewe mu ruganda rw’ibyuma bivugwa ko rukiyoborwa n’abasirikari ba Ukraine.
Yves UMUHOZA
RWANDATRIBUNE.COM
