Perezida wa Repubulika iharanira Demokasi ya Congo, Felix Tshisekedi yakuyeho Gen Mbala Munsense ku mwanya w’Umugaba w’Ingabo, amuzimbuza Gen Christian Thiwewe Songesha wari ukuriye umutwe udasanzwe w’Abamurinda.
Ni impinduka zatangajwe kuri uyu wa 3 Ukwakira 2022, binyuze kuri Radio na Televisoyo y’igihugu.
Gen Célestin Mbala Munsense wasimbuwe kuri uyu mwanya yari yaragizwe umugaba Mukuru wa FARDC muri Nyakanga 2018, akomeza inshingano ze na nyuma y’uko perezida Tshisekedi atorewe kuyobora igihugu mu mwaka 2019.
Muri izi Mpinduka kandi, Gen Christian Thiwewe Songesha wari umugaba w’Umutwe urinda Perezida yahise asimbuzwa Gen Maj Ephraim Kabi Kiriza.
General Major Christian Thiwewe ni muntu ki?
Gen Maj Christian Thiwewe Songesha wagizwe Komanda wa FARDC yavutse kuwa 27 Ukwakira 1968 , avukira i Lubumbashi mu ntara ya Haut Katanga.
Mu mwaka w’ 1998 yabaye umwe mu bofisiye ba FARDC batorejwe muri Sudan. Hagati ya 1999 na 2000 yigaga mu ishuri ry’abafisiye rya Mura, riri Likasi.
Mu mwaka 2003-2004 yagiye kwihugura mu masomo yo kurwanya iterababwoba yatangwaga n’abanya-Israel mu gihugu cya Angola. Aho yavuye yoherezwa kwiga mu ishuri ry’abafosiye Bakuru rya Kinshasa kuri Buruse yahawe na Joseph Kabila . (Ambien/)
Kuwa 2007 Kugeza muri 2011, Gen Thiwewe yagizwe umuyobozi wa Rejima ya 13 y’ingabo zirinda Perezida yari ifite icyicaro mu mujyi wa Lubumbashi.
Mu mwaka 2014 kugeza 2020.Gen Thiwewe yagizwe Komanda wungirije w’umutwe udasanzwe urinda umukuru w’Igihugu, ashinzwe ubutasi n’iperereza muri uyu mutwe.
Mu mwaka 2020, yahawe ipeti rya General Major, bidatinze mu mwaka 2021, agirwa umuyobozi w’Abarinda Umukuru w’Igihugu.
N’ubwo hatatangajwe impamvu, Gen Mbala Munsense yakuwe ku mwanya, gusa abasesenguzi bavuga ko bifitanye isano n’Ubugambanyi, Perezida Tshisekedi amaze iminsi avuga ko buri mu basirikare bakuru b’iki gihugu.
