Perezida w’u Burundi yageze muri Angola mu biganiro by’imishyikirano y’u Rwanda na DRC

Perezida w’Igihugu cy’u Burundi, Evariste Ndayishimiye unayoboye umuryango wa Afurika y’Iburasirazuba (EAC) yitabiriye ibiganiro byo guhuza u Rwanda na Repubulika Iharanira Demokarasi ya Congo bigiye kubera i Luanda muri Angola.

Byatangajwe n’Ibiro by’umukuru w’Igihugu cy’u Burundi, mu butumwa byanyujije kuri Twitter kuri uyu wa Gatatu tariki 23 Ugushyingo 2022.

Ubu butumwa bwa Perezidandi y’u Burundi, bugira buti “Umukuru w’igihugu c’Uburundi akongera akaba arongoye umuryango w’Ibihugu vya Afrika y’ubuseruko yashitse i Luanda aho yitavye inama y’abakuru b’Ibihugu bo mu karere ku bijanye amahoro n’umutekano mu buseruko bwa RDC.”

Ibi biganiro bigiye guhuriramo Perezida Evariste Ndayishimiye, Paul Kagame w’u Rwanda na Felix Tshisekedi wa Congo Kinshasa, byatumijwe na Perezida wa Angola, João Manuel Gonçalves Lourenço usanzwe ari umuhuza hagati y’u Rwana na Repubulika Iharanira Demokarasi ya Congo.

Ni inama ije ikurikira indi yabaye muri Nyakanga uyu mwaka wa 2022, yari yanafatiwemo imyanzuro isaba M23 gushyira intwaro hasi kandi ikava mu birindiro byayo byose no mu bice yafashe.

Inama igiye kuba kuri iyi nshuro, isanze rwarongeye kwambikana hagati ya FARDC na M23 aho uyu mutwe wongeye gufata n’ibindi bice birimo Kibumba.

RWANDATRIBUNE.COM