RDC: L’ONU iramagana ibitero ikomeje kugabwaho n’abaturage ba Congo

Intumwa idasanzwe y’umunyamabanga mukuru wa ONU akaba ari na we uyoboye MONUSCO aramaganira kure “Uruhererekane rw’ibitero” byagabwe ku bakozi bari mu butumwa bwo kubungabunga amahoro muri Repubulika ya Demokarasi ya Congo.

Mw’itangazo yacishije ku rubuga rwa X, rwahoze rwitwa Twitter, Bintou Keita avuga ko imodoka zitari nke za MONUSCO zatwitswe, ibindi bikoresho birimo n’inyubako bikangizwa n’abigaragambya ku biro by’abakozi b’uyu muryango ejo ku wa gatandatu mu murwa mukuru Kinshasa.

Abari muri iyi myigaragambyo buzuye uburakari bwinshi, biraye mu mihanda yose bamagana icyo bise ukwivanga kw’u Rwanda mu makimbirane n’intambara bigaragara mu Burasirazuba bwa Congo, ni mu gihe kandi bakomeza gushinja bimwe mu bihugu by’uburengerazuba ko bishigikiye iki gihugu bo bashinja ko kivogera ubutaka bwabo.

Imyigaragambyo yabaye kandi , yanabereye imbere y’ikigo ndangamico cya Amerika hamwe n’imbere ya Ambasade y’Ubufaransa i Kinshasa, mbere y’ umunsi umwe habaye indi myigaragambyo nk’iyi kuri Ambasade y’Ubwongereza.

Muri iri tangazo, Bintou Keita avuga ko iterabwoba n’ibitero ku bakozi b’Umuryango w’abibumbye l’ ONU n’imiryango yabo ari ibintu bidashobora kwihanganirwa, agasaba ubutabera gutangira gukora iperereza kugira ngo bute muri yombi ababikoze kandi bagezwe imbere y’ubucamanza.

Keita kandi avuga ko ibi bitero bigira ingaruka zitari nziza ku nshingano z’imiryango imwe n’imwe ikorera muri iki gihugu byumwihariko, ku nshingano z’uyu muryango w’abibumbye bityo Keita akavuga ko iterabwoba n’ibitero ku bakozi b’ishirahamwe ry’umuryango w’abibumbye ONU n’imiryango yabo ari ibintu bidashobora kwihanganirwa.

Naho kuri MONUSCO, Keita aragira ati: “Ibi bitero bibangamira ubushake bwo gutera inkunga ingabo zishinzwe umutekano muri Repubulika ya Demokarasi ya Congo”, akamaganira kure iyicwa ry’aba basirikare boherejwe kubungabunga amahoro muri icyo gihugu.

Kuva mu myaka, urwango rw’abanyekongo ku butumwa bw’ingabo za ONU, MONUSCO rwagiye rwiyongera aho abaturage bakomeje kubabazwa n’amakimbirane ndetse n’intambara zikomeza kwisukiranya mu burasirazuba bwa Congo aho bashinja izi ngabo ko ntacyo zabamariye mu myaka irenga 20 yose zimaze muri iki gihugu.

Muri iyi myaka ishize, hagiye hakunda kugarahgara ubushyamirane hagati y’abaturage ba Congo n’ingabo ziri mubutumwa bw’amahoro MONUSCO, zoherejwe n’umurango w’abibumbye bazamagana.

Mu mwaka ushize wa 2023, abategetsi ba Congo bakaba barafashe icyemezo cy’uko izi ngabo zigomba gutaha zigasubira iwabo bitewe n’izi mpungenge nyine ko ntacyo zabamariye mu gihe cyose zamaze muri iki guhugu cya Congo.

Rafiki Karimu 

Rwanda tribune.com