Umuvugizi mubya politike wungirije w’umutwe wa M23 OScar Barinda yatangaje ko bamaze kubohora abaturage bo mu mujyi wa Sake ibi akaba yabitangaje mu kiganiro cyihariye yagiranye na Radio 10.
Amakuru aremeza ko M23 yafashe uwo mujyi wa Sake ku munsi w’ejo nimugoroba.
Oscar Barinda yagize ati: “Sake ubu twamaze kuyifata, intare za Sarambwe zamaze kuyifata zibohora abaturage, hari abari bagiye twabarokoye.
Ati: “Ihuriro rifatanya na leta kuturwanya twabirukanye, amabandi yose batoraguye batize igisirikare bajya banirasa twabakuyemo. Ingabo za leta twazirukanye zigeze Mubambiro na Mugunga.”
Uyu muvugizi akaba yatangaje ibi mu gusobanura itangazo ryari ryasohowe n’umutwe wa M23 uhumuriza abaturage batuye mu mujyi wa Sake ko bahumura bari hafi yo kuza kubabohora mu maboko y’umwanzi .
Umuvugizi wungirije wa M23 (mu byapolitike) atangaje ibi nyuma y’uko impande zihanganye muri Congo zimaze igihe zihanganye bikomeye muri uyu mujyi wa Sake, bikaba byaranatumye ingabo za Sadc niza Monusco zijya muri uyu mujyi wa Sake kugirango hongererwe ingufu ingabo za Congo (Fardc).
Ibi kandi bikaba byarongeye gushimangirwa na Minisitiri w’umutekano muri Congo Jean Pierre Bemba aho yagiranaga ikiganiro n’abanyamakuru akabwira abaturage ko bakwiye kumenya ko izi ngabo zose zifatanyije na Fardc mukurwanya M23.
Abakurikiranira hafi ikibazo cy’umutekano mu burasirazuba bya Congo bavuga ko imirwano idashobora gukemura ikibazo gihari ko igikwiye ari ukubahiriza amasezerano leta ya Kinshasa yagiranye n’umutwe wa M23.
Mucunguzi Obed
Rwandatribune.com
