Ihuriro ry’amashyirahamwe y’umuco riharanira iterambere rya Ituri (UNADI) ku cyumweru (7 Mutarama) ryamaganye icyemezo cya Corneille Nangaa cyo guhamagarira imitwe yitwaje intwaro ya Ituri kwinjira mu mutwe we w’inyeshyamba Alliance Fleuve Congo (AFC).
Mu itangazo ryashyizwe ahagaragara mu nama rusange idasanzwe yabaye ku cyumweru i Bunia, imiryango y’abanyamuryango ba UNADI yiyemeje kurwanya, guhashya no gutsinda burundu uyu mutwe mushya witwaje intwaro.
Michel Meta Wani, umunyamuryango wa UNADI, yagize ati ” Itangazo rya Nangaa, wahoze ari Perezida wa CENI ni rye bwite we ku giti cye kandi ntacyo rivuze kuri twebwe, abaturage ba Ituri. Turaburira Bwana Corneille Nangaa n’itsinda rye kudatinyuka kuvuga intara ya Ituri mu mu kanwa ke.”
Ikindi kandi, iri huriro ry’amashyirahamwe y’umuco riharanira iterambere rya Ituri rirasaba abaturage kugaragaza uwo ari we wese ufite igitekerezo cyo kwihuza na Nangaa mucyo bise umugambi mubisha wo guhungabanya umutekano wa Ituri ubundi agashyikirizwa butabera agahanwa.
Michel Meta Wani Ati “Turasaba abantu bose batuye i Ituri kwima amatwi no kudasakaza aya matwara ya Corneille Nanga yuzuyemo umugambi wo guhungabanya umutekano wa Repubulika Iharanira Demokarasi ya Congo muri rusange na Grande Orientale by’umwihariko.
Michel Meta Wani yongeyeho ati “Mbonereho n’umwanya wo guhamagarira abakobwa n’abahungu b’Uburasirazuba bukomeye muri rusange ndetse n’Abaturage b’Abanya ituri by’umwihariko bamaze igihe mu bwoba bw’intambara kuba maso no kwamagana ibikorwa byose bigamije guhungabanya umutekano wa Repubulika iharanira Demokarasi ya Congo.”
Ubuyobozi kandi bw’iri huriro ry’amashyirahamwe y’umuco riharanira iterambere rya Ituri (UNADI) bwasabye Guverinoma ya Congo kugarura amahoro muri iyi ntara no gusubizaho ubutegetsi bwa Leta mu ntara ya Ituri.
Iri huriro rihuje imiryango 21 y’amoko yo muri ako gace atandukanye , rigaragaza ko Ituri imaze kugwamo abantu benshi mu myaka makumyabiri ishize, naho abantu barenga miliyoni imwe n’igice bavanywe mu byabo n’intambara
Rafiki Karimu
Rwanda tribune.com
