Raphaël Yanyi wari Perezida w’urukiko rwisumbuye i Kinshasa waburanishaga urubanza ruregwamo Vital Kamerhe wahoze ayoboye ibiro bya Perezida Tshisekedi, yitabye Imana kuri uyu wa Gatatu.
Yanyi yapfuye mu rukerera rwo kuri uyu wa Gatatu azize guhagarara k’umutima, nkuko byatangajwe na Radiookapi.
Bamwe mu bo mu muryango w’uwo mucamanza batangaje ko yari asanganywe ibibazo by’ubuzima ndetse ko yajyaga kwivuza kenshi hanze y’igihugu.
Kamerhe n’umucuruzi Samih Jammal bakurikiranyweho kunyereza asaga miliyoni 50 z’amadolari ya Amerika, mu mafaranga yari yatanzwe ngo akoreshwe hubakwa ibikorwa remezo mu mezi atatu ya mbere y’ubutegetsi bwa Tshisekedi mu 2019.
Kamerhe wari inshuti y’akadasohoka ya Perezida Tshisekedi, yatangiye kunugwanugwa mu ntangiriro z’uyu mwaka, kuba yari inyuma y’inyerezwa ry’imari ya Leta.
Abatavuga rumwe na Leta bo bavuga ko urwo rubanza ari urwa politiki rwo kwikiza Kamerhe, kuko ari we wahabwaga amahirwe yo kwiyamamariza kuyobora RDC mu matora azaba mu 2023.
Ndacyayisenga Jerome
