RDC: Undi muyobozi ukomeye mu rwego rw’iperereza mu gisirikare yapfuye
Mu ijoro rya tariki ya 1 rishyira iya 2 Werurwe 2020 ni bwo hamenyekanye inkuru y’urupfu rwa Léon Lukaku wari ukuriye ishami rishinzwe amabanga y’iperereza no kurikurikirana (Counterintelligence service) mu gisirikare cya Repubulika Iharanira Demukarasi ya Congo.
Urupfu rwe rukurikiye urwa Gen. Major Delphin Kahimbi wari Umugaba w’Ingabo za RD Congo Wungirije, ushinzwe iperereza, ubu inzego zibishinzwe zikaba zatangiye iperereza kuri uru rupfu, zibisabwe n’abarimo Perezida Félix Tshisekedi.
Jeune Afrique dukesha aya makuru ivuga ko impamvu y’urupfu rwa Lukaku itaramenyekana gusa ngo hari amakuru avuga ko ashobora kuba yari arwaye.
Iki kinyamakuru kivuga ko muri Gashyantare 2020, Lukaku na we yari yambuwe izi nshingano mu rwego rw’iperereza rwa gisirikare (ANR), aya makuru ngo yemejwe n’umuntu ukora mu biro by’Umukuru w’Igihugu.
Gen. Kahimbi we yapfuye tariki ya 28 Gashyantare 2020 nyuma y’igihe kitageze ku munsi akuwe ku nshingano yahawe na Joseph Kabila, habura umunsi umwe ngo yegurire ubutegetsi Tshisekedi. Ubwo byakekwaga ko yiyahuye, hakurikiraho amakuru avuga ko yishwe n’indwara y’umutima nk’uko umugore wa Kahimbi yabivuze. Mu byo yashinjwaga mu bubasha yari afite, harimo ibyaha bya ruswa ndetse no kutubahiriza uburenganzira bw’ikiremwamuntu.
N’ubwo bari bamaze gukurwa ku nshingano zabo, urupfu rwa Lukaku na Gen. Kahimbi rushobora gutera ihungabana mu butasi bwa RD Congo ndetse no mu mutekano wayo. Birasaba iperereza ryimbitse ku gisa n’uruhurirane rw’urupfu rw’abakomeye mu rwego rushinzwe iperereza, kugira ngo abafite amakenga bagaragarizwe ukuri kutabogamye.
Mwizerwa Ally
