Umusirikare mu ngabo za Repubulika iharanira Demokarasi ya Congo yishe atemye umunyeshuri wiga mu mashuri abanza mu gace ka Minembwe muri Teritwari ya Fizi mu ntara ya Kivu y’Amajyepfo.
Umuvugizi wa FARDC muri Kivu y’Amajyepfo , Lt Marc Elongo yemeje aya makuru anasobanura ko impamvu uyu musirikare yatemye umunyeshuri kugeza amwishe yabitewe n’ubusinzi.
Yagize ati “ Hari nka saa Kumi z’Umugoroba wo kuri uyu wa 10 Ukwakira 2022, Uyu musirikare yari yasinze bigaragarira amaso, ubwo yatemaga uyu mwana utagize icyo abatwaye. Turamagana bikomeye iki gikorwa cy’urugomo ndetse tunasaba ko kitakwitirirwa ingabo z’igihugu kuko atari mu nshingano yatumwe n’igisirikare.”:
Lt Elongo yemeje ko uyu musirikare yamaze gufatwa, ndetse ko inteko izamuburanisha ikirimo gushakishwa , akazaburanira muri ako gace ka Minembwe.
Iki gikorwa kije gikurikira icyabaye kuwa 7 Werurwe 2022, aho Umusirikare wasinze nawe yishe arashe abasirikare 2 bagenzi be mu gace ka Mukindja ho muri teritwari ya Fizi.
