Abarwanyi ba FDLR, APCLS, Mai Mai CMC na Mai Mai Nyatura bagose agace ka Mweso abasilikare ba FARDC 45 babuze uko basohokamo.
Ibintu bikomeje kujya iwa ndabaga ubwo ihuriro ry’abarwanyi bashigikiwe n’uwahoze ari Perezida Joseph Kabila aribo: FDLR, APCLS, Mai Mai CMC na Mai Mai Nyatura bakomeje ibitero muri Kivu y’Amajyaruguru aho bamaze kwirukana ingabo za Leta mu bice bya Masisi na Mweso.
Ku munsi w’ejo kuwa Gatandatu taliki ya 10 Mata 2021, izi nyeshyamba zinjiye mu gace ka Mweso mu gihe Inyeshyamba za FDLR zo zarwanaga zerekeza ahitwa mu Bwiza ziyobowe na Col.Ruhinda, izi nyeshyamba kandi ziravuga ko ziri kurwana ku ruhande rw’uwahoze ari Perezida Kabila.
Ibi bibaye kandi mu gihe abakuru b’imiryango bo mu Ntara ya Tanganyika bandikiye Perezida Tshisekedi bavuga ko murumuna wa Joseph Kabila unayoboye intara ya Tanganyika ko ari gushinga imitwe myinshi y’abarwanyi mu gace ka Kalemi na Masisi.
Ibi bikorwa by’abarwanyi bije bikurikira inama nyinshi zagiye ziba rwihishwa zagiye zihuza amahuriro y’Abakongomani bo mu bwoko bw’Abahutu, FDLR, Mai Mai Nyatura na APCLS.
Umwe mu basilikare bakomeye ba FARDC utashatse ko amazina ye atangazwa yabwiye umunyamakuru wacu uri Goma ko hahamagajwe wa mutwe udasanzwe HIBOU SPECIAL FORCE wibera i Kinshasa kuza guhangana n’izi Nyeshyamba.
Shamukiga Kambale
