Umuryango utabara imbabare, Croix Rouge muri RDC uvuga ko mu mezi 6 ashize umaze kuvura inkomere zirenga 634 barimo ingabo za Leta baba bakomerekeye ku rugamba mu burasirazuba bw’iki gihugu.
Lassané Zongo uyobora Croix Rouge muri Kivu y’Amajyepfo yavuze ko muri aba 634 , abenshi muri bo bakiriwe mu bitaro bya Bukavu , Goma na Beni aho ngo babatabara bavirirana nyuma yo kurasirwa mu mirwano baba bahanganyemo n’inyeshyamba.
Yagize ati:” Mu mezi 6 ashize, tumaze kwakira inkomere zakomerekejwe n’amasasu zirenga 600. Abenshi bakiriwe mu bitaro bya Ndosho, Beni na Goma muri Kivu y’Amajyaruguru na Bukavu muri Kivu y’Amajyepfo”
Zongo akomeza avuga ko barimo kongera ingufu mu bikorwa byo gutabara inkomere ndetse ngo bashyizeho itsinda ritanga amahugurwa mu bice birimo kuberamo intambara cyane cyane muri Kivu y’Amajyaruguru aho Ingabo z’Igihugu zihanganye na M23.
