Kabuga Felicien yari umuterankunga wa RNC ku mafaranga yanyuzaga mu kigega cyiswe Umurage wa Rwigara cyashinzwe na Ben Rutabana
Kabuga yafashwe kuri uyu wa Gatandatu tariki 16 Gicurasi 2020, I Paris mu Bufaransa afashwe n’ubuyobozi bw’iki gihugu.
Urwego rwasigariyeho Inkiko Mpuzamahanga Mpanabyaha, IRMCT ni rwo rwatangaje aya makuru.
Ruvuga ko Kabuga yafashwe n’inzego z’u Bufaransa, nk’umusaruro w’ubufatanye bwari buhari bugamije gushakisha Kabuga wari umaze imyaka 26 yihishahisha.
Itabwa muri yombi ry’uyu mugabo wari umwe mu bafite umutwe uhenze mu isi y’abazima kuko Leta zunze ubumwe z’Amerika zari zarasizeho akayabo ka miliyoni 5 z’amadolari kuwamufata,byabaye amarira ku muryango we ndetse n’abarwanya Leta y’uRwanda bari hanze cyane cyane RNC ya Kayumba Nyamwasa na FDLR ya Gen.Byiringiro Victor,biba inkuru nziza kuri Leta y’uRwanda kuko Kabuga Felicien akekwaho kuba umucurabwenge n’umuterankunga wa Jenoside yakorewe abatutsi.
Kabuga Felicien n’ubwo yahigwaga ntiyigeze aruhuka kuko amakuru agera kuri Rwandatribune.com avuga,dukesha bamwe mu bahoze mu gicengezi cya FDLR,avugako Kabuga Felicien yari umufatanyabikorwa wa FDLR,kuva mu 1996 ubwo havukaga ALIR yaje kuba FDLR,bavuga ko amafaranga yose yavaga kwa Kabuga yanyuraga mu ntoki za Col.Rutaganda Jean Damacsene muri FDLR uzwi nka Col.Mazizi,naho kuri facebook yiyita Donat Gapyisi,uyu mugabo akaba yarahoze ari Burugumestiri wa Komini Murama,muri Perefegitura uyu Mazizi akaba yarakatiwe n’inkiko Gacaca ku byaha bya Jenoside yahakorewe.
Kabuga Felicien kandi akaba yari umuterankunga mu kigega cya RNC cyiswe Umurage wa Rwigara Assinapol iki kigega kikaba cyarashinzwe na Ben Rutabana uherutse kurigiswa n’inzego z’ubutasi bwa Uganda CMI,ku kagambane ka Kayumba Nyamwasa,bivugwa ko amafaranga iki kigega cyari kizigamye menshi yashyirwagamo na Kabuga Felicien ayanyujije kuri Ben Rutabana.
Abakurikiranira hafi ibya politiki basanga nka RNC ya Kayumba Nyamwasa yamunzwe no gusubiranamo,igikorwa cy’ifatwa rya Kabuga Felicien gisa n’igihuhuye RNC,kuri FDLR naho bizayigora cyane kuko kuva yamburwa ibirindiro byayo bikomeye nka Kazaroho na Parisi ya Nyamuragira aho yasoreshaga igatwikisha amakara,ikaba yari isigaranye inzira imwe y’amafaranga yavaga kwa Kabuga nayo bishobora kuyigora n’ubwo n’ubusanzwe itorohewe n’ibitero bya HIBOU SPECIAL FORCE wa mutwe udasanzwe ubarizwa mu ngabo za Repubulika iharanira demokarasi ya Congo.
Mwizerwa Ally
