Ahagana saa Yine n’iminota 37, umutingito uri ku gipimo cya 5,1 wumvikanye mu bice bitandukanye by’igihugu, ndetse umaze kwangiza inzu icumi n’imwe mu Karere ka Rubavu.
Ni umutingito ufite inkomoko mu Kiyaga cya Kivu. Uyu mutingito watewe n’ubwivumbagatanye bw’amazuku (magma) buri kubera mu nda y’isi, nyuma y’iruka ry’Ikirunga cya Nyiragongo ryabaye kuri uyu wa 22 Gicurasi 2021.
Kugeza ubu uyu mutingito umaze kwangiza inzu 11 zirimo iya Uwimana François, ikoreramo akabyiniro ka ’Sky Nevada’ ndetse n’irimo aka ’Cotton Club’.
Inzu zirindwi muri izo 11 zasenyutse ni izo mu Kagari ka Byahi mu Murenge wa Gisenyi.
Umuhanda wa kaburimbo unyura ku rusengero rwa ADEPR Gisenyi mu Mujyi rwagati ujya kuri Stade Umuganda Rubavu wasadutse bidakabije, wiyashijemo imitutu.
Bizimana Sylvestre ufite inzu yangiritse yavuze ko yasadutse “Ku buryo wajugunyamo igiceri kikagenda.”
Umunyamabanga Nshingwabikorw w’Umurenge wa Gisenyi, Tuyishime Jean Bosco, yavuze ko abaturage badakwiye gutinya, ahubwo bagategereza amabwiriza y’ubuyobozi.
Kuva Nyiragongo yaruka, imitingito mito mito yakomeje kumvikana mu bice bitandukanye by’u Rwanda ndetse mu gitondo cy’uyu munsi humvikanye undi mutingito uri ku gipimo cya 4,7.
Ubwo twandikaga iyi nkuru ,hakomeje kuba imitingito myinshi kandi ikomeye mu mujyi wa Gisenyi,k’uburyo umubare w’ibyangiritse bikomeza kwiyongera .
Mwizerwa Ally
