Umwuka utari mwiza,kwikubira,amacakubiri nibyo byaba biri inyuma y’itoroka ry’Abasilikare bo ku rwego rwa Ofisiye 11,n’aba Su Ofisiye 60 mu gihe cy’ukwezi
Nkuko isoko y’amakuru ya Rwandatribune iri Nyabanira ,muri Gurupoma ya Binza Teritwari ya Rutshuru muri Repubulika iharanira demokarasi ya Congo ibivuga,muri uyu mutwe hakomeje kuba icyuho cy’abarwanyi bari bakomeye muri uyu mutwe bakomeje kurambika intwaro hasi ,bakishyira mu maboko y’ingabo za MONUSCO ,abandi bakerekeza muri Uganda.
Iyi nkundura ikaba yarahereye mu itsinda ry’abarwanyi bitwaga aba RNC baje baturutse i Masisi bageraga kuri 45,abo barwanyi bari barokotse ibitero bya FARDC ahitwa i Gatoyi muri Masisi ibyo bitero akaba aribyo byafatiwemo Majoro Mudathiru na bagenzi be boherezwa mu Rwanda.
Ubwo aba barwanyi bageraga muri RUD Urunana bayobowe na Ntare usanzwe ari muramu wa Frank Ntwari,abarwanyi ba RUD ntibabizeye bakunze kubishisha barebera mu ndorerwamo y’ubwoko,byatumye Ntare wari wahawe ipeti rya Majoro,akuramo ake karenge abeshya ko agiye kubavuganira muri Uganda agenda ubutagaruka.
Majoro Ntare akaba yaratorokanye n’abandi ba Ofisiye 8 harimo uwitwa Lt.Nafutari,kugeza ubu itsinda ryitiriwe RNC hakaba hasigayeyo abarwanyi 8 gusa bamwe baratorotse abandi bagiye bicwa na Maj.Gavana,abashinja ubugambanyi.
Umunyamakuru wacu uri Kiwanja mu kiganiro yagiranye n’umwe mu bayobozi ba Gurupoma ya Binza utarashatse ko amazina ye atangazwa yamubwiye ko kuva ukwezi kwa Kamena kugeza ubu hamaze gutoroka abandi ba Ofisiye 11,harimo uwitwa Cpt.Chris Rukundo wayoboraga unite yitwa Tunis na Cpt Teodore wayoboraga inite yitwa Sarajevo yabaga ahitwa Mikotokoto,bose bakaba barahise bahungira muri Uganda.
Uyu muyobozi avugako intandaro ari amafaranga yagiye yibwa abaturage abavuye mu bikorwa by’ubusahuzi ntibahembweho n’igiceri ahubwo akajya mu mufuka wa Majoro Nshimiyimana Cassien uzwi nka Gavana usanzwe ukuriye Kompanyi CRAP.
Umutwe wa RUD URUNANA washinzwe mu mwaka wa 2003 ushingwa na Gen Ndibabaje Musare aho yarafatanyije na Maj Kanyamibwa ubarizwa muri Amerika,ahagana mu mwaka wa 2016 ubwo Gen Musare yicwaga n’abarwanyi ba Candayira,agasimburwa na Gen Afurika,habaye kutumvikana na Maj Pilote Kanyamibwa,Inyeshyamba za RUD Urunana zihita zikora ubufatanya n’ishyaka rya FDU Inkingi kugeza ubu.
Ubwo inyeshyamba za RUD Urunana zagabaga igitero mu Kinigi abahagarariye Ishyaka rya RUD Urunana bamaganiye kure ibyo bitero bavuga ko batakiri kumwe n’izo nyeshyamba,mu itangazo basohoye rigenewe itangazamakuru aho bavugaga ko badakwiye kwitirirwa ibikorwa nabo barwanyi ko ahubwo byabazwa abakuriye FDU Inkingi,barimo Ingabire Victoire Umuhoza na Maj Faustin Ntilikina.
Kambale Shamukiga
