Kuwa Gatatu tariki ya 9 Ukuboza 2020 Umusirikare mukuru muri FARDC yateye icyuma umusivili wari mu rubanza na mubyara we mu gace ka Kako ko muri Rutshuru.
Amakuru aturuka muri Kivu ya Ruguru avuga ko umusore witwa Gentil yishwe atewe icyuma cyo ku mbunda n’uyobora ingabo za Kongo FARDC mu gace ka Kanzanza kari muri Kivu ya Ruguru.
Kuri uyu wa kane, tariki ya 10 Ukuboza, umuyobozi umwe muri Teritwari ya Rutshuru Mbusa Mukanda Aimé yabwiye Umunyamakuru wacu ukorera iGoma,ko byose byatangiriye ku makimbirane ashingiye ku butaka Gentil wishwe yari afitanye na Mubyara we.
Maj.Ndjike Umuvugizi wa FARDC muri Kivu y’Amajyaruguru
Yagize ati:Umusirikare rero yari inshuti na mubyara wa Gentil,Ubwo baburanishwaga n’inzego zisanzwe , bananiwe kumvikana uwo musirikare ahita afata icyuma cyo ku mbunda agitera Gentil ahita apfa. Umurambo we washyizwe mu buruhukiro bw’ibitaro bikuru bya Rutshuru.
Kugeza ubu umwirondoro w’uyu musirikare wakoze amahano nturatangazwa , gusa abaturage bakaba bakomeje gusaba ko yakurikiranwa n’inzego zibifite mu nshingano.
aya makuru kandi yemejwe n’Umuvugizi w’ingabo za Repubulika iharanira demokarasi ya Congo muri Operasiyo Zokola Maj Ndjike Kaiko mu kiganiro yagiranye na Rwandatribune,yagize ati:ni koko habaye ubwicanyi bwakozwe n’umusilikare wacu,twatangiye gukora iperereza kugirango tumenye icyateye kwica uwo musivili.
Mwizerwa Ally
