Umutwe wa M23, wongeye gukozanyaho na FDLR n’indi mitwe ya CMC Nyatura ,APCLS na Nyatura Abazungu yibumbiye mu kwiswe Wazlendo iterwa inkunga na Guverinoma ya Repubulika Iharanira Demokarasi ya Congo.
Amakuru dukesha imboni ya Rwandatribune.com iherereye muri teritwari ya Masisi , avuga ko guhera mu rukerera rwo kuri uyu wa 21 Kamena 2023, aribwo umutwe wa M23 watangiye guhangana n’inyeshyamba za FDLR zifatanyije n’imitwe izwi nka ”Nyatura”, imirwano yabereye mu byaro bitandukanye bigize Localite ya Butale, Gurupoma ya Bushali-Mukoto ho muri tertwari ya Masisi.
Aya makuru, akomeza avuga ko iyi mirwano, yatangijwe n’iyi mitwe isanzwe ifasha ingabo za Leta FARDC kurwanya M23, ubwo yashakaga gusubira mu duce M23 yarekuye muri Teritwari ya Masisi, byatumye isakirana n’Abarwanyi ba M23 bari bamaze gutahura aya makuru.
Imirwano ikomeye, yabereye ahazwi nka”Sadron ya Kavumu na Lufulalindi iza gukomereza mu nkengero z’agace ka Kibarizo mu birometero bike uvuye Kitshanga ho muri teritwari ya Masisi mu masaha y’umugoroba.
Tobirwakyo Kahangu Umuyobozi wa Sosiyete sivile muri Sheferi ya Bashali, yabwiye itangazamakuru ko “iyi mirwano yatumye abaturage barenga 1000 bo mu ku dusozi twa Kavumu, Nganga, Murambi na Lufulanindi bahunze berekeza mu gace ka Mokoto.”
Gusa Tobirwakyo Kahangu, yavuze ko hari abaguye muri iyo mirwano ariko kugeza magingo aya, umubare wabo ukaba utaramenyekana.”
Kugeza ubu,yaba Guverinoma ya DR Congo n’Umutwe wa M23, bakomeje kwitana ba mwana aho buri wese ashinja undi, kuba nyirabayazana w’iyi mirwano yongeye kubura hagati ya M23 n’imitwe y’ibumbiye mu kiswe ‘Wazalendo’ ,irimo nuw’Abanyarwanda uzwi nka”FDLR imitwe ishigikiwe na guverinoma ya DR Congo .
Claude HATEGEKIMANA
Rwandatrbune.com
