Muri Sudan umuryango w’abibumbye,ishami rishizwe impunzi (HCR), ryatangaje ko abaturage barenga miliyoni bamaze gukurwa mu byabo n’intambaro imaze ukwezi ishyamiranije ingabo za Leta n’umutwe wa Rapid Support Force.
Matthew Saltmarsh umuvugizi wa HCR yavuze ko abagera ku bihumbi 843 bakuwe mu byabo ariko bahungira imbere mu gihugu, naho abagera kuri 250 000 bahungira mu bihugu bituranye na Sudan.
Muri ibi bihugu, Misiri ni yo yakiriye umubare munini w’impunzi, ungana n’abantu ibihumbi 110. Ibindi bihugu bifite impunzi nyinshi zavuye muri Sudan birimo; Chad, Sudan y’Epfo na Ethiopia.
Iyi ntambara ikomeje gushegesha abaturage ba Sudan kuko n’ibikomoka kuri peteroli bikomeje kubura ndetse n’aho bibonetse bikaba bihenda, bikaba bisaba abahunga gukoresha amagare n’indogobe cyangwa bakagenda n’amaguru.
Kugeza ubu, iherezo ry’iyi ntambara ryo riragaragara nk’irikiri inzozi kuko impande zihanganye zidashaka gusasa inzobe, dore ko Umuyobozi w’Ingabo za Sudani Gen Abdel Fattah Al Burhan, kuwa 16 Gashyantare yakuye Gen Mohamed Dagalo uzwi nka Hemedti uyobora umutwe wa Rapid Support Forces (RSF), mu nama ya gisirikare iyoboye igihugu akamusimbuza Malik Agar, umuyobozi w’umutwe witwaje intwaro wasinyanye na guverinoma amasezerano y’amahoro mu 2020.
Kubera iyi ntambara ibihugfu bitandukanye byaba ibyo muri Afurika yo hirya no hino ku isi bakuye abaturage bayo muri iki gihugu cyugarijwe n’urufaya rw’amasasu.
