Tariki ya 11 Mutarama 2022 nibwo hamenyekanye iby’impanuka y’imodoka yari itwaye abanyamaukuru bari mu rugendo shuri rwateguwe na Polisi . Iyi mpanuka yabereye mu ntara ya Mwanza yaguyemo abanyamakuru bagera kuri batanu barimo uwitwa Johari Shani .
Byabaye nk’ibitungurana mu muhango wo gushyingura abaguye muri iyi mpanuka ubwo Johari Shani wari uzwi nk’umunyamakuru ukorera ikinyamakuru Mwananchi ashyinguwe nk’umupolisi w’intwari.
Umurambo wa Johari Shani wagejejwe aho ushyingurwa uri mu modoka ya Polisi, ndetse no kuwushyingura hakorwa akarasisi n’indi mihango yose ikorerwa abofisiye muri polisi bari mu nshingano nko kurasa mu kirere n’ibindi.
Umuyobozi wa Polisi ya Arusha , ACP Justin Masego yasobanuye ko nkuko babibonye uyu Johari Shani yari umwe mu bakora akazi ka gipolisi ndetse anahishura ko yari asanzwe afite ipeti rya WP mu gipolisi cya Tanzania.
