Abagize umutwe wa CNRD/FLN , bavuga ko kuva batangiza urugamba rwo kurwanya Ubutegetsi bw’u Rwanda, ntacyo barabasha kugeraho kubera guhuzagurika no kutabasha kumenya icyo gukora.
Ibi n’ibyatangajwe na Kubwayo Anastase umwe mu bambari bakomeye b’umutwe CNRD/FLN .
Kubwayo Anastase agereranya CNRD/FLN nk’abantu bapanze umushinga ariko bwacya bagashwana uwo mushinga batabashije kuwubyaza umusaruro.
Akomeza avuga ko imiyaga n’imihengeri byugarije umutwe wa CNRD/ FLN, byatumye uyu mutwe ucikamo ibice maze utatanya imbaraga zawo, kubera kurwanira ubutegetsi n’amafaranga y’imisanzu , ndetse ko iyi ari imungu itumye CNRD/FLN yari imaze iminsi yigamba gufata Ishyamba rya Nyungwe icikamo ibice bibiri.
Akomeza avuga ko abagize CNRD/FLN bamaze igihe bahuzagurika ndetse ko kugeza magingo aya batarabasha kumenya ibyo barimo.
Yagize ati:”CNRD/FLN imeze nk’abantu bapanze umushinga ariko bwacya bagahita bashwana batageze ku musaruro. Iyo abantu bari bafatanyije ariko bagatangira kwitandukanya, baba bari gutatanya imbaraga zabo. Izo ngufu dutatanya n’izo zakadufashije kugera ku ntego yacu ariko turacyahuzagurika, turacyafite ibibazo. Byageze aho imungu yo kurwanira ubutegetsi n’amafaranga itugeramo, dutangira gucikamo ibice.’’
Ibi bije nyuma yaho umutwe wa CNRD/FLN umaze iminsi waracitsemo ibice bibiri harimo igice kiyobowe na Lt Gen Hakizimana Hamada usanzwe ari umugaba mukuru w’Ingabo za FLN, n’ikindi gice cya Gen Maj Hakizimana Antoine Jeva wari ushinzwe ibikorwa bya gisirikare muri uyu mutwe.
Amakuru yo kwizerwa agera kuri Rwandatribune.com dukesha umwe mu bahoze mu barwanyi ba FLN utarashatse ko amazina ye atangazwa kubera umutekano we, avuga ko ikibazo kimaze iminsi mu mutwe wa CNRD/ FLN cyanatumye icikamo ibice bibiri bitavuga rumwe. Akomeza avuga ko ikibazo kiri muri FLN ari amakimbiranire ashingiye ku kurwanira Ubuyobozi, amafaranga aturuka mu misanzu y’abayoboke babo, n’ibibazo by’ingutu biterwa n’irondakarere rya Kiga- Nduga rimaze kuba agatereranzamba mu mitwe irwanya Ubutegetsi bw’u Rwanda.
HATEGEKIMANA Claude
Rwandatribune.com
