Umuyobozi w’Ishyaka TPLF akaba n’umugaba mukuru w’ingabo za Tigray yateye utwatsi ubusabe bwa Guverinoma ya Ethiopia ibasaba kumanika amaboko nta mananiza bitarenze kuwa Gatatu tariki 25 Ugushyingo 2020 .
Debretsion Gebremichael yahakanye ibivugwa na leta ya Ethiopia ko umurwa mukuru Mekelle wa Tigray wazengurutswe n’ingabo zayo.Amakuru avuga ko abantu babarirwa mu magana bishwe naho ababarirwa mu bihumbi za mirongo bahunze iyi mirwano imaze ibyumweru hafi bitatu.
Umuryango w’abibumbye waburiye ko iyo mirwano ihuje ingabo za Ethiopia n’abarwanyi ba TPLF ishobora gutera amakuba yatuma abantu benshi bo mu karere bakenera imfashanyo.
Ku cyumweru tariki ya 22 Ugushyingo , Minisitiri w’intebe wa Ethiopia Abiy Ahmed yari yatanze amasaha 72 ku mutwe wa TPLF ngo ube wamanitse amaboko, ndetse igisirikare cya Ethiopia kiburira abaturage 500,000 batuye i Mekelle ko abasirikare bazagota uwo mujyi bakawugabaho igitero.
Debretsion, ukuriye TPLF, yagize ati”” Ntabwo Minisitiri Abiy arasobanukirwa abo turibo. Twe turi abantu bahagarara ku ihame kandi biteguye gupfa mu guharanira uburenganzira bwacu bwo gutegeka akarere kacu.
TPLF ni ryo shyaka rikomeye muri Tigray ndetse ryigeze kuba rifite umutwe ukomeye w’intagondwa wayoboye urugamba rwo guhirika leta ya Ethiopia yari iriho, mu mwaka wa 1991.
Nkuko bitangazwa n’ibiro ntaramakuru Reuters, umukuru wa Tigray yanavuze ko ibivugwa na leta ya Ethiopia ku murwa mukuru Mekelle ari uburyo bwo guhishira ko ingabo zayo zicyeneye kongera kwisuganya, nyuma yo gutsindwa ahantu hatatu.
Bitenaijweko ikibazo cya TPLF na Leta ya Ethiopia kiza kuganirwaho mu kanama k’umutekano mu muryango wabibumbye iterana uyu munsi.
