Nyuma y’uko mu gitondo cyo kuru uyu wa Mbere tariki 09 Mutarama 2023, Bus itwara abanyeshuri igeze ku I Rebero igata umuhanda , bamwe muri bo bagakomereka,Perezida Paul Kagame yihanganishije imiryango yabo ndetse abifuriza gukira vuba.
Umukuru w’Igihugu mu butumwa bwe kuri Twitter, yavuze ko amakuru y’iyi mpanuka yayamenye, yifuriza abana bakomeretse gukira vuba ndetse yihanganisha imiryango yabo.
Ati “Namenye amakuru y’impanuka ya bisi y’ishuri yabereye i Rebero muri iki gitondo. Twifurije abana bose gukira vuba kandi turahumuriza imiryango yabo.Turakora ibishoboka byose kugira ngo abana bari bayirimo bose bitabweho uko bikwiye.”
Mu gitondo cyo kuri uyu wa Mbere tariki 9 Mutarama 2023 nibwo Coaster yari itwaye abanyeshuri bagiye kwiga ku ishuri rya Path to Success yakoze impanuka igeze mu masangano y’imihanda ku i Rebero, ahari umuhanda umanuka i Gikondo n’undi ukata ujya mu Miduha na Nyamirambo.
Ntubwo umubare w’abana bari muri iyi modoka utaramenyekana , inzego za Polisi zemeje ko ntawayiguyemo kandi abakomeretse bajyanwe mu bitaro bitandukanye birimo CHUK nkuko byemejwe n’ Umuvugizi w’Ishami rya Polisi rishinzwe umutekano wo mu muhanda, SSP René.
Yavuze ko kugeza abakomeretse ari Shoferi n’abana 25 na mwarimu kandi ko nta bafite ibibazo bikomeye byatuma bahaburira ubuzima, usibye umwe urimo kongerwa amaraso muri CHUK.
