Ikipe idasanzwe y’abakozi b’urwego rw’ubutasi rw’Igisirikare cya Uganda, CMI batangaje ko baburijemo igitero cy’umwiyahuzi cyagombaga kubera ahari kubera umuhango wo gusezera ku murambo wa Maj Gen Paul Lokech mu gace ka Pader.
Nkuko byemezwa n’ababonye uko byagenze, ngo umwiyahuzi yabwiye CMI ko yitwa Katumba Abdul uzwi ku izina rya Ben.Bivugwa ko yari yambaye ikoti rizirikiyemo igisasu nkuko igitangazamakuru Soft Power News kibivuga.
Umwe mu bakozi ba CMI yahamirije itangazamakuru ko uyu mwiyahuzi yafashwe koko, gusa avuga ko adashobora kugira byinshi atangaza cyane kuri iyi Operasiyo igikomeje, gusa avuga ko ngo iyo hataba CMI , byari kurangira nk’uko byagenze mu mwaka 2010.
Kuwa 11 Nyakanga 2010 umwiyahuzi yaturikirije igisasu mu nzu yerekenirwamo imipira i Lugogo mu mu murwa mukuru Kampla. Icyo gihe hari ku mukino wa Nyuma w’igikombe cy’Isi cyahuje Spain n’Ubuholandi, abagera kuri 74 bahasize ubuzima mu gihe abandi 85 bakomeretse bikomeye . Icyo gihe iki gitero cyigambwe na Al-Shabaab ifite icyicaro gikuru mu gihugu cya Somalia.
Gen Paul Lokech witabye Imana mu cyumweru gishize, ni umwe mu bahoze bakuriye amakipe y’igigirikare cya Uganda UPDF yahoraga ku rugamba ahanganye n’iterabwoba , nkaho kuva mu mwaka 2011 kugeza 2012 no kuva mu 2017 kugeza 2018 yayoboye ingabo za UPDF zari mu butumwa bwo kurwanya umutwe wa Al Shabaab mu murwa mukuru wa Somalia Mogadishu.
Kugeza ubu, Katumba Abdul wari witeguye kugaba iki gitero, ntibizwi niba ari uwo mu mutwe wa Al Shabaab cyanga ADF , dore ko iyi mitwe yombi igendera ku matwara akaze ya Islam kandi ikaba ihuriye ku kuba idacana uwaka na Uganda.
