Perezida Yoweri Kaguta Museveni wa Uganda akanaba Umugaba w’Ikirenga w’ingabo z’icyo gihugu, yazamuye mu ntera Maj Gen Paul Lokech uheruka gupfa amugira Lieutenant General.
Izamura mu ntera rya Gen Lokech ryatangajwe na Minisitiri w’Umutekano muri Uganda, Gen Kahinda Otafiire, mu muhango wo kumushyingura wabaye ejo ku wa Gatanu.
Mu butumwa bwa Perezida Museveni bwasomwe na Gen Otafiire, yavuze ko yagize Lokech Lt Gen ku bw’umusanzu we udasanzwe ku mutekano wa Uganda ndetse n’uw’akarere muri rusange.
Umukuru w’igihugu cya Uganda kandi yashimiye Gen Lokech ku bw’ubutwari n’ubunyangamugayo byamurangaga, atanga isezerano ryo gukomeza gufasha no kuba hafi umuryango we.
Mu gitondo cyo ku wa Gatandatu w’icyumweru gishize ni bwo Gen Paul Lokech wari Umuyobozi Mukuru Wungirije wa Polisi ya Uganda yapfuye azize urupfu rutunguranye.
Ku munsi w’ejo ni bwo yashyinguwe ku gisekuru cye mu karere ka Pader.
