Ingabo z’u Rwanda ziri mu butumwa bwo kugarura amahoro mu Ntara ya Cabo Delgado muri Mozambique, zasuwe n’Umugaba Mukuru w’ingabo za Mozambique, Admiral Joaquim Mangrasse.
Iki gikorwa cyabaye kuri uyu wa Kabiri tariki 13 Nzeri 2022 nkuko tubikesha ubuyobozi bw’Ingabo z’u Rwanda, butangaza ko Admiral Joaquim Mangrasse yasuye ingabo z’u Rwanda ziri mu gace ka Mocimbao da Praia muri iyi Ntara ya Cabo Delgado.
Muri uru ruzinduko rwe yanakiriwemo n’abayobozi b’Ingabo ziri muri ubu butumwa bwo guhashya ibyehebe, Admiral Joaquim Mangrasse yashimye intambwe imaze guterwa mu guhashya ibyehebe kuva ingabo z’u Rwanda zaza muri ubu butumwa.
Yaboneyeho gushima ubufatanye butajegajega buri hagati y’ingabo z’u Rwanda n’iza Mozambique, muri ibi bikorwa biri gutuma ibihumbi n’ibihumbi by’Abanya-Mozambique bari baravuye mu byabo bari kubisubiramo.
RWANDATRIBUNE.COM
