Umushoramari w’i Rubavu Sandro Shyaka, wari washimuswe na FDLR yarekuwe hatanzwe akayabo k’amadorari atavuzweho rumwe
Ejo mu masaha ya ni mugoroba nibwo umucuruzi Sandro Shyaka yasesekaye mu mujyi wa Goma nk’uko byatangajwe n’umwe mu bavandimwe be ba hafi utashatse ko amazina ye atangazwa mu kiganiro yagiranye na Rwandatribune.
Mu nkuru y’ubushize twamukozeho yagiraga iti:https://rwandatribune.com/umushoramari-wirubavu-sandro-shyaka-yashimutiwe-muri-dr-congo-na-fdlr/ , uyu mushoramari akaba yarajyanwe n’abarwanyi ba FDLR ahitwa Camp Lac hari inyeshyamba zari ziyobowe na Lt.Ndayizeye Yvon uherutse gutabwa muri yombi na FARDC .
Amakuru atugeraho avuga ko ibihumbi 10 by’amadorari aribyo byaba byatanzwe kugirango uyu mushoramari arekurwe,mu gihe umwe mu basilikare ba FARDC utashatse ko amazina ye atangazwa yavuzeko hatanzwe ibihumbi 5 by’amadorari.
Umwe mu bavandimwe ba Sandro Shyaka we avuga ko kugirango uyu mugabo arekurwe hatanzwe amafaranga menshi ariko byagizwe ibanga ku mpamvu z’umutekano wa Shyaka bikaba byagizwe ibanga rikomeye,gusa yahamije ko Sandro ariwe mu mujyi wa Goma.
Hamaze iminsi hari ikibazo mu bice bya Goma na Rutscuru,cyo gushimuta abantu bakarekurwa hatanzwe akayabo k’amafaranga abashyirwa ku isonga muri ibi bikorwa n’umutwe w’inyeshyamba za FDLR,FPP-ABAJYARUGAMBA ya Gen.Dani ,RUD URUNANA,Mai Mai Nyatura na Mai Mai CMC.
Shamukiga Kambale
