Mu ijoro ryo kuri uyu wa Kabiri taraiki 2 Werurwe 2021 abantu bitwaje intwaro bataramenyekana barasiye Maj. William Assani wari usanzwe ari umugenzuzi w’ingabo za Congo muri Teritwari ya Rutshuru mu muhanda umwe n’uwo Ambasaderi w’Ubutaliyani Luca Attanasio aheruka kurasirwamo.
Ibinyamakuru bitandukanye byandikirwa muri Repubulika Iharanira Demokarasi ya Congo byanditse ko Maj Assani yatezwe igico n’abantu bitwaje intwaro ubwo yari ageze mu gace ka Katale mu muhanda uva i Goma werekeza Rutshuru.
Usibye Maj. Assani warashwe agahita apfa, iki gitero cyanakomerekeje Col. Lumbu usanzwe ari umuyobozi wa Regima ya 3409 mu ngabo za Repubulika iharanira Demokarasi ya Congo, mu gihe ku ruhande rw’abakigabye umwe ariwe wahasize ubuzima.
Umuhanda Goma Rutshuru mu gace kitiriwe Trois Antennes niho haretse kurasirwa,Ambasader w’Ubutaliyani muri iki Gihugu Luca Attanasiyo we n’umurinzi we n’umushoferi we bose bahasiga ubuzima. Intera y’ibirometero 20 niyo itandukanije agace ka Katale karasiwe Maj. Assani na Trois Antennes yarasiwemo ambasaderi Luca Attanasio Kuwa 22 Gashyantare 2021.
