Ihuriro ry’imitwe y’inyeshyamba zirwanya ubutegetsi muri Congo Kinshasa(CMC / FDP) ryagaragaje impamvu itangaje yatumye hagabwa igitero kuri Pariki y’igihugu ya Virunga kigahitana abarinzi 6 ku cyumweru tariki ya 10 Mutarama 2021.
Mu itangazo rigenewe abanyamakuru ryatanzwe kuri uyu wa kabiri, tariki ya 12 Mutarama, uyu mutwe wavuze ko iki gitero ari ingaruka z’amakimbirane amaze igihe kinini ari hagati y’abakozi ba Pariki ya Virunga n’abaturage baturiye iyi pariki basabaga ko bahabwa uburenganzi bwo kugenzura igice cya pariki cyegereye imidugudu batuyemo.
Nk’uko CMC / FDP ibivuga abagabye iki gitero ni abarwanyi umutwe wa Mai-Mai ya Kabote wahawe ubufasha n’abarwanyi bake bo muri Jadot, ugatega igico abarinzi ba pariki batandatu ahitwa Chanika mu burengerazuba bw’ikiyaga cya Edward ”.
Iki gitero cyaguyemo abashinzwe umutekano wa parike ya Virunga batandatu (6). Iki gikorwa cyahise cyamaganwa n’abaharanira uburenganzira bw’ikiremwa muntu bakorera mu burasirazuba bwa Repubulika iharanira Demokarasi ya Congo.
Ildephonse Dusabe
