Mu rukerera rwo kuri uyu wa 21 Ukwakira 2023,Imirwano ikaze yongeye kubura hagati y’inyeshyamba za M23 n’Ingabo za Repubulika ya Demokarasi ya Congo ( FARDC), n’abambari bazo aribo FDLR, Wazalendo, Wagner na Nyatura.
Iyi mirwano yatangiye ahagana mu masaha ya saa saba z’ijoro, ibera mu gace ko Mugihongo, muri Teritwari ya Masisi, mu Ntara ya Kivu y’Amajyaruguru.
Iki gitero cyagabwe n’Ingabo za FARDC zifatanyije n’abafatanyabikorwa bazo ku nyeshyamba za M23 ziri muri ako gace twavuze haruguru.
Iyi mirwano ibaye mu gihe hari hamaze iminsi itanu, hari agahenge k’amahoro hagati y’impande zombie zihanganye mu Burasirazuba bwa Congo
Amakuru dukesha imboni ya Rwanatribune iri mu bwiza avuga ko ingabo za FARDC, n’abambari bazo, batangiye kuyabangira ingata ubwo izo nyeshyamba za M23 zari zimaze kwambarira urugamba zirwanaho.
Umwe mu nyeshyamba za M23 nawe watanze amakuru yagize ati “Ubu dutangiye kubirukaho bagize ngo ni imikino. Ndakubwiza ukuri turaza kubereka uko dukora, kuko bari gukinisha umuriro kandi umuriro ntakindi ukora uretse gutwika.”
Kugeza ubwo twandikaga iyi nkuru imbunda zikomeye ziracyari kumvikana mu nkengero za Bwiza, kuko ni hafi yo Mugihonga.
Uwineza Adeline
Rwanatribune.Com
