Nyuma y’urugamba rukomeye rwaraye rubereye mu nkengero za Sake na Rubaya ubwo indege z’intambara zo mu bwoko bwa Kajugujugu ,Sukhoi 25 ndetse n’ibifaru byasukaga umuriro ku nyeshyamba za M23 yari yamaze kwigarurira Rubaya, ubu hari urujijo k’uwaba afite aka gace hagati ya FARDC yahawe itegeko ryo kugaruza aka gace na M23 yari yamaze kukinjiramo
Itsinda ry’inyeshyamba ryiyise intare za Sarambwe ryamaze kwinjira muri aka gace ka Rubaya rihita ritangaza ko badashobora gusubira inyuma, aka gace kandi bagafashe nyuma yo gufata Mushaki,bakimara kuhafata rero ingabo za Leta zahise zitabaza intwaro zikomeye zirimo n’ibifaru byari biri gukoreshwa n’abacanshuro.
Kurundi ruhande ariko ingabo za Leta zahise zihabwa itegeko rikomeye ryo kurinda Rubaya , Sake ndetse n’umujyi wa Goma nk’uko umuvugizi w’ingabo za Leta muri Sokora 2 Lt Col Guillaume Ndjike Kaiko yabitangaje.
Bakimara guhabwa aya mategeko bahise bitabaza intwaro zabo zose ariko biranga biba iby’ubusa, cyakora muri iki gitondo Lt Col Guillaume Ndjike Kaiko yatangaje ko umujyi wa Rubaya ubu iri mu maboko ya FARDC mugihe na bamwe mubarwanyi ba M23 bari guhamya ko ubu Rubaya iri mu maboko yabo.
Kugeza ubwo twandikaga iyi nkuru byari bitaramenyekana neza uwaba avugisha ukuri ndetse n’uwaba afite mu biganza aka gace gakungahaye ku mabuye y’agaciro.
Umuhoza Yves
