Muri Uganda, umugabo wari ufunzwe ukekwaho kwiba amashilingi 1 600 000, yapfiriye muri Kasho ya Polisi. Kuri ubu Polisi yo mu karere ka Rukungiri iri gukora iperereza ku rupfu rw’umugabo w’imyaka 26 y’amavuko.
Nk’uko tubikesha ikinyamakuru Daily Monitor cyo muri Uganda, ivuga ko uyu mugabo wahawe amazina ya Benjamin Akampa a.k.a Kyojo, akaba umuturage wo mu gace ka Kitojo Central, mu cyaro cya Buyanja, ni we wapfiririye muri kasho yo ku biro bya Polisi bya Buyanja mu buryo budasobanutse.
Umuvugizi wa Polisi mu gace ka Kigezi, Mr Elly Maate, avuga ko uyu ukwekwa yaba yarakubiswe na bagenzi be mbere y’uko afungwa, akaba aribyo byamuteye gupfa ageze kuri polisi.
Yagize ati: “Bagenzi be barimo uwitwa Allan Atweta hamwe na Niwamanya Ivan, Tumuhairwe Merry, Tumuhairwe Yusufu n’abandi batangiye kumushaka. Bamusanze mu kabari k’ahitwa Trading Centre, baramufata bamujyana mu nzu itazwi maze baramukubita.”
Maate yongeyeho ko impamvu bamukubise ari uko yari yanze kubarangira aho televiziyo iherereye, ngo nibwo bamujyanye kuri polisi ya Buyanja ngo afungwe. Yongeraho kandi ko amakuru ava mu bo bari bafunganywe, avuga ko mbere yo gupfa yabanje kuribwa mu gifu, bikekwa ko byaba byaraterwaga n’inzoga yari yanyoye.
Umubiri we wajyanywe mu buruhukiro bw’ibitaro by’ahitwa Rwakabengo ngo harebwe neza icyo yaba yazize. Abandi bane bo bakomeje gufungwa mu gihe iperereza rigikomeje.
UWINEZA Adeline
