Urukiko rw’Ibanze rwa Kicukiro rwafashe icyemezo cyo kuburanisha mu muhezo Ishimwe Dieudonne uzwi nka Prince Kid nyuma y’uko bisabwe n’Ubushinjacyaha.
Muri uru rubanza ku ifungwa n’ifungurwa ry’agateganyo rwatangiye kuri uyu wa Gatanu nyuma y’uko ku wa 11 Gicurasi 2022 rwari ryasubitswe, itangazamakuru ryahise ribuza gufata amajwi.
Umushinjacyaha yasabye ko uru rubanza rubera mu muhezo ku mpamvu mbonezabupfura n’impamvu z’umutekano w’abaregwa n’abatangabuhamya.
Dieudonné Ishimwe yahise yaka ijambo asaba Urukiko ko urubanza rwe rwabera mu ruhame.
Prince Kid wagaragaje impamvu yashingiragaho iki cyifuzo cye, yavuze ko kubera ko inkuru y’itabwa muri yombi rye yumvishwe cyane mu itangazamakuru ari na ho yasabye ko barukurikirana kugeza bamenye ko ubutabera butanzwe.
Umucamanza amaze kumva impande zombi, yanzuye ko uru rubanza rubera mu muhezo kuko impamvu z’ubushinjacyaha zumvikana gusumbya iz’uregwa.
Abanyamakuru n’abandi bari baje gukurikirana uru rubanza bahise bategekwa gusohoka mu cyumba cy’uru rukiko.
Ishimwe Dieudonne uzwi cyane nka Prince Kid aregwa ibyaha bitatu aribyo: Gukoresha undi imibonano mpuzabitsina ku gahato, gusaba undi ishimishamubiri rishingiye ku gitsina, guhoza undi ku nkeke bifitanye isano n’imibonano mpuzabitsina byose bivugwa yakoze akorera abakobwa bagiye bitabira irushanwa rya Miss Rwanda ryategurwaga n’ikigo Rwanda Inspiration Back Up yari abareye umuyobozi.
RWANDATRIBUNE.COM
