Urwego rw’igihugu ry’ubugenzacyaha RIB rwatangaje ko rwataye muri yombi Byamungu KIZUNGU Claude ufite ubwenegihugu bwa Congo Kinshasa, akaba akekwaho gucuruza amahembe y’inzovu.
Inzego z’umutekano mu Rwanda zatangaje ko zafatiye Byamungu KIZUNGU Claude w’imyaka 39 ku mupaka wa Bugarama, uhuza u Rwanda na Congo, ku itariki ya 26/02/2024 atwaye amahembe y’inzovu agizwe n’ibice 41 bipima ibiro 81.5kg.
Urwego rw’Igihugu rw’Ubugenzacyaha, RIB ruvuga ko ariya mahembe yavuye muri Repubulika Iharanira Demokarasi ya Congo (DRC) ahitwa Uvira, akaba yari guca mu Rwanda akagera i Goma muri Kivu ya Ruguru.
Uyu mugabo akaba yari yayahishe amahembe mu munsi y’ ikamyo yari itwaye imifuka ya SIMA igiye mu mujyi wa Goma, yiciye mu Rwanda kuko ari yo nzira ya bugufi.
Byamungu akimara gutabwa muri yombi yahise ajyanwa kuri RIB, Sitasiyo ya Muganza mu gihe dosiye ye igitunganywa ngo ishyikirizwe Ubushinjacyaha.
RIB ivuga ko hagati ya 2018 na 2023, hakozwe dosiye 23 zijyanye n’abaregwa gufatanwa amahembe y’inzovu 104, yafatanwe abantu batandukanye.
Aya mahembe aba ajyanwe ku isoko, abayafatanywe bayinjije mu Rwanda bayakuye mu bihugu nka Repubulika Iharanira Demokarasi ya Congo, na Tanzania.
Umuvugizi w’Urwego rw’Igihugu rw’Ubugenzacyaha, RIB, Dr Murangira B. Thierry, yabwiye UMUSEKE dukesha iyi nkuru ko RIB itazihanganira uwo ari we wese ukora icyaha nk’iki cyo kwinjiza amahembe y’inzovu mu buryo bunyuranije n’amategeko, kandi ko ubikora wese azafatwa agashyikirizwa ubutabera.
Yakomeje avuga ko uriya mugabo akurikiranywehoho gutunga ikintu gikomoka ku binyabuzima ndangasano byashyizwe ku rutonde, bityo akaba ashobora guhabwa igihano kiri hagati y’imyaka 5 n’imyaka 7 y’igifungo akanishyura ihazabu iri hagati ya miliyoni 5Frw na miliyoni 7Frw mu gihe icyaha yagihamywa n’urukiko.
Rafiki Karimu
Rwandatribune.com
